HATAW! D'yaryo ng Bayan hatawtabloid.com
PINANGUNAHAN ng mga pambansang atleta na sina Ronald Oranza at Jude Gabriel Francisco, kasama ang Filipino-American na si Mary Joyce Monton, ang Criterium races bilang panimula ng aksiyon sa PhilCycling National Championships for Road 2026 noong Lunes sa Tagaytay City.
Nanguna si Oranza sa Men’s Elite category, namayani si Francisco sa Men’s Under-23, at si Monton—na nakabase sa Los Angeles—ang pinakamahusay sa Women’s Elite ng kampeonato na inorganisa ng PhilCycling sa pangunguna ni Philippine Olympic Committee president Abraham “Bambol” Tolentino.
Nakumpleto nina Edson Corbadora at Ronnilan Quita ang podium sa Men’s Elite ng karerang ginanap sa 2.2-kilometrong sirkito na nagsimula at nagtapos sa Praying Hands Monument sa Tagaytay City. Samantala, nagtapos na 1-2 sina Marvin Mandac at Mark Alex Baruelo sa Under-23 race.
Pumangalawa at pumangatlo kina Monton ang mga pangunahing miyembro ng national team na sina Maritoni Krog at Phoebe Salazar sa karerang itinanghal ng Standard Insurance, MVP Sports Foundation at Philippine Sports Commission, at sinuportahan ni Tagaytay City Mayor Brent Tolentino at ng Tagaytay CT Velodrome.
Nangibabaw naman sina Rayven Joy Valdez, Althea Campana at Angeline Elvira sa Women’s Under-23 ng karera na sinuportahan din ng Excellent Noodles at 7-Eleven Philippines.
Sa Junior races, nakumpleto nina CJ Cabreros, Kylle Flores at Piolo Calimlim ang podium sa Men’s division, habang nagwagi sina Maria Louisse Criselle Alejado, Althea Nicole Coronado at Eloiza Pajarito sa Women’s contest.
Ang iba pang nagwagi sa Youth categories ay ang mga sumusunod:
Men (12-13) — Mark Terrence Orcino, Ren Axcel Pecson at Johnzoe Canasa;
Women (14-15) — Allaeza Mae Gulmatico, Alessandra Nicole Paras at Princess Jaydee Pancho;
Men (14-15) — Jannshen Sta. Juana, Jyohan Toledo at Louie Jerome Murillo.
Paglalabanan din ang Individual Time Trial at Individual Road Race events simula Martes hanggang Biyernes. (PhilCycling/HNT)
