HATAW! D'yaryo ng Bayan hatawtabloid.com
HATAW News Team
TATLONG buwan at dalawang taon o eksaktong 820 araw bago ang national elections, nagdeklara si Vice President Sara Zimmerman Duterte – Carpio na siya ay tatakbong presidente ng Filipinas sa Mayo 2028.
“Ako si Sara Duterte tatakbo bilang pangulo ng Filipinas,” anunsiyo ni VP Sara, sa ipinatawag na press conference kahapon.
Una sa naturang press con, ipinag-utos ni VP Sara ang pagtanggal ng logo ng Office of the Vice President sa podium.
Sa kanyang talumpati, humingi siya ng paumanhin para sa kanyang mga naging desisyong pampolitikal.
“Mga kababayan, humihingi ako ng paumanhin sa inyong lahat. Patawad kung tinulungan kong mahalal si BBM bilang Pangulo ng ating bansa,” aniya.
Sinabi ng Bise Presidente, nabigo si Pang. Ferdinand Marcos, Jr. na tuparin ang mga ipinangako sa mga mamamayan noong panahon ng kampanya at gampanan ang kanyang sinumpaang tungkulin.
Inihayag ni Duterte na bumaba siya sa kanyang posisyon sa gabinete dahil hindi niya kayang suportahan ang 2025 national budget na ‘tadtad ng katiwalian’.
“Dahil hindi ko kinayang maging bahagi ng 2025 national budget na tadtad ng katiwalian, pinili kong umalis sa Gabinete,” diin ni VP Sara.
Inisa-isa ang aniya’y mga kabiguan ng administrasyong Marcos gaya ng patuloy na pagbaha, pagtaas ng presyo ng mga pangunahing bilihin, kawalan ng seguridad sa pagkain, mahinang healthcare systems, mga impraestruktura, pagdami ng mga krimen, pamamayagpag ng ilegal na droga, at terorismo.
Binatikos din ang tinawag niyang kawalan ng malinaw at independiyenteng foreign policy ng pamahalaan.
Hindi pinalampas sa kanyang talumpati ang mga politically motivated na aksiyon ng pamahalaan laban sa kanya.
Aniya, “Matagal na akong inaatake gamit ang buong makinarya ng kapangyarihan.”
Dagdag niya, bagamat hindi natatakot para sa kanyang sarili, nangangamba siya para sa kinabukasan ng bansa, at ng mga susunod na henerasyon.
Sinabi ng Bise Presidente, ang kanyang pagkandidato bilang pangulo ay isang pag-aalok ng serbisyo imbes pag-apela ng simpatiya.
“I cannot kneel before each and every Filipino to beg for forgiveness. Instead, I offer my life, my strength, and my future in the service of our nation,” aniya.
Matapos ang binasang limang pahinang talumpati, hindi sumagot si VP Sara sa mga katanungan mula sa mga mamamahayag.
