HATAW! D'yaryo ng Bayan hatawtabloid.com
HUMATAW ang mga Batang Pinoy swimmers, sa pangunguna ng pambansang junior standout na si Riannah Coleman at ng Palarong Pambansa star na si Titus Sia, laban sa malalakas na estudyanteng atleta sa Asya sa katatapos na AOSI Long Course Swimming Championships sa Assumption University Aquatic Center sa Bangkok, Thailand.
Ang 13-anyos na si Coleman, sinanay ni Dax Halili, ay nagpakita ng isang dominanteng kampanya upang makuha ang parangal na Most Outstanding Swimmer (Senior Girls 13-over) matapos walisin ang lahat ng walong gintong medalya para sa koponan ng kababaihan ng National Academy of Sports (NAS).
Sinira rin niya ang apat na rekord sa meet, na nagbigay-daan sa akademya na pinapatakbo ng gobyerno sa ika-apat na puwesto sa pangkalahatan na may kabuuang 59 edalya — 20 ginto, 15 pilak, at 24 tanso.
Isang dalawang beses na miyembro ng Southeast Asia Age-Group national team, ang Filipino-British swimmer ay nagwagi sa pool sa 50-meter freestyle (29.22), 50m breaststroke (35.05), 100m breaststroke (1:16.09), 200m breaststroke (2:44.57), 200m individual medley (2:31.63), 50m butterfly (29.87), at 100m butterfly (1:07.77).
Natapos niya ang kanyang golden sweep bilang bahagi ng Mixed 4x50m freestyle relay, kasama sina Caelyn Pascual, Jet Berueda, at Matthew Lopez para sa oras na 1:49.47.
Binura ni Coleman ang matagal nang rekord sa 50m at 200m breaststroke sa oras na 36.68 at 2:57.41, ayon sa pagkakasunod, na dating hawak ng Filipino swimmer na si Shiloah San Diego, at muling ibinalik ang marka sa 200m individual medley na dating pagmamay-ari ng Indonesian na si Lipika Dev (2:51.32).
Binasag din niya ang 100m butterfly record na itinakda ni Mia Lee ng Guam (1:10.82).
Nagdagdag si Colemen ng silver medal sa 4x50m medley relay at bronze medal sa Mixed 4x50m medley, kasama si Matthew Gaerlan.
Samantala, si Sia ng Xavier School ay itinanghal na Most Outstanding Swimmer (Senior Boys 13-over) matapos ang isang kampanyang nakapagtala ng rekord na kinabibilangan ng mga tagumpay sa 1500m freestyle (18:03.40), 200m backstroke (2:21.87), 400m freestyle (4:24.92), 800m freestyle (9:18.16), at 200m freestyle (2:08.01), kasama ang isang gintong medalya sa 100m backstroke (1:06.81). Nakakuha rin siya ng medalyang pilak sa 100m freestyle (58.29).
Pinangunahan ni Sia ang Patriots sa overall championships tangan ang kabuuang 84 medalya tampok ang 25 ginto, 29 silver at 30 bronze.
Kabilang sa iba pang mga nagwagi ng gintong medalya sa Patriots ay sina Jeb Skyler Tugap (Boys 12, 50m at 100m freestyle); Jan Dwayne Malpas (Boys 14, 50m freestyle); Gerald Esquivel (Boys 17, 100m freestyle); Ignazio Javier Avellanosa (Boys 9, 200m freestyle); Ethan Joseph Parungao (Boys 10, 400m freestyle); at Dominic Joseph Nacnac (Boys 13, 800m at 1500m freestyle).
Nangunguna rin sa podium para sa NAS sina Richard Nielson Navo (Boys 15, 50m freestyle) at Jet Deryl Berueda (Boys 16, 50m at 100m freestyle).
Ang iba pang mga nagwaging Filipino na nagtamo ng gintong medalya sa kompetisyon ay sina Quintin Zee Sabalande ng Hydro Immersion Cebu (Boys 18, 50m freestyle); Meadow Frances Harrison ng Maharlika Aquatics (Girls 11, 50m freestyle); Adrianna Erika Ching ng Hydro Cebu (Girls 10, 100m freestyle); Luke Matthew Magbanua ng Bukidnon Aqua (Boys 10, 200m at 400m freestyle); Kacie Gabrielle Tionko ng Salabites Swim Sting (Girls 18, 400m freestyle); at Matt Gabriel Magbanua ng Bukidnon (Boys 12, 800m at 1500m freestyle). (HNT)
