HATAW! D'yaryo ng Bayan hatawtabloid.com
MALINAW ang pananaw si Philippine Olympic Committee (POC) president Abraham “Bambol” Tolentino habang nagpapadala ang Filipinas ng dalawang atleta sa 25th Winter Olympics sa Milan at Cortina, Italy: “Walang imposible!”
Ayon kay Tolentino, lumipad patungong Italy kahapon upang sumama sa delegasyon ng Filipinas, ang pagkapanalo ng bansa ng tatlong gintong medalya sa huling dalawang edisyon ng Summer Olympics ay patunay na kayang magtagumpay ng mga atletang Filipino saan mang panig ng mundo.
“Napatunayan na namin na posible ito,” sabi ni Tolentino habang inaabangan ang edisyong ito ng Winter Olympics na opisyal na magsisimula ngayon, kung saan lalahok ang 2,871 atleta mula sa 92 bansa.
Ang mga alpine skier na sina Francis Ceccarelli, 22, at Tallulah Proulx, 17, ang magdadala ng bandila ng Filipinas. Unang sumali ang bansa sa Winter Olympics noong 1972 sa Sapporo, Japan, na may dalawang atleta rin.
Hindi pa nakakukuha ng medalya ang Filipinas sa Winter Olympics, ngunit nagwagi ng gintong medalya sa Asian Winter Games sa men’s curling sa Harbin, China noong nakaraang taon. Gayonman, kapos sa puntos ang nasabing koponan upang makapasok sa Winter Olympics ngayong taon.
Sinabi ni Tolentino, ang mga ginintuang sandali ng bansa sa 2020 at 2024 Summer Olympics sa Tokyo at Paris—sa pangunguna nina weightlifter Hidilyn Diaz Naranjo at gymnast Carlos Yulo—kasama ang buong suporta ng Philippine Sports Commission (PSC) sa ilalim ni chairman Patrick Gregorio, ang magsisilbing lakas ng loob ng delegasyon sa Milan at Cortina.
“Singhirap ng Summer Olympics ang Winter Olympics. Pero nagawa na natin ito dati,” dagdag ni Tolentino.
Sasabak sina Ceccarelli at Proulx sa men’s at women’s alpine skiing (giant slalom at slalom) sa 14-15 Pebrero, ayon sa pagkakasunod.
“Hangga’t naniniwala tayo, kaya at magtatagumpay ang ating mga atleta,” sabi ni Gregorio. (POC/HNT)
