HATAW! D'yaryo ng Bayan hatawtabloid.com
ISANG tricycle driver ang bumagsak at agad na namatay nang barilin sa batok ng isang pintor sa Dasmariñas City, Cavite, nitong Lunes, 2 Pebrero.
Kinilala ang biktima na isang alyas Ricky, tricycle driver, residente sa Brgy. Datu Esmael, Dasmariñas City, Cavite, habang ang arestadong suspek ay tinukoy na isang alyas Moises, isang pintor, residente sa Sanitary Compound, Brgy. Sta. Lucia, Dasmariñas City.
Nabatid sa imbestigasyon, dakong 5:55 ng hapon noong Lunes, 2 Pebrero, isang tawag sa telepono ang natanggap ng Dasmariñas CCPS investigator at iniulat ang insidente.
Agad nagsadya ang duty investigator sa lugar ng insidente upang i-verify ang ulat.
Nabatid na naglalakad ang biktima mula sa kanyang bahay nang lumapit ang suspek galing sa likuran, bumunot ng baril ng hindi tukoy na kalibre saka pinaputukan sa batok ang biktima na naging sanhi ng kanyang kamatayan.
Agad dinala ng pamilya ng biktima ang bangkay sa kanilang Mosque sa Datu Esmael bilang pagtalima sa kanilang tradisyon.
Inaresto ang biktima ng mobile patrollers at intelligence group sa follow-up operations ng SWAT, sa pangunguna ng OIC ng estasyon, sa pamamagitan ng hot pursuit operation at sa pakikipagtulungan ng mga barangay officials ng Datu Esmael at ng saksi.
Nakatakdang ihain ang kasong murder laban sa suspek sa opisina ng City Prosecutor’s Office ng Dasmariñas kapag naihanda na ang mga kinakailangang dokumento. (BOY PALATINO)
