Batbat ng anomalya, DPWH Bulacan binalasa ni Dizon

INAYOS at muling nagtalaga ng mga posisyon sa loob ng Bulacan DPWH Office si Public Works Secretary Vince Dizon matapos masangkot ang mga opisyal nito sa mga nangyayaring anomalya sa flood control projects.

Sa isang kautusang na inilabas ng Kalihim noong 26 Nobyembre, itinalaga ni Dizon si Kenneth Edward Fernando, dating Engineer III sa DPWH Central Office Construction Division, bilang officer-in-charge assistant district engineer ng Bulacan 1st DEO at kasabay na OIC-Human Resource and Administrative Section chief.

Ibinalik din ni Dizon si Paul Genar Lumabas, dating Engineer III sa DPWH Public-Private Partnership Service (PPPS), bilang Bulacan 1st DEO OIC ng Planning and Design Section at si Hector Homer Tuazon, isa ring Engineer III sa DPWH PPPS ay na-reassign bilang OIC ng Construction Section.

Samantala, si Ferdinand Vergara Jr., dating Engineer II sa DPWH Bureau of Research and Standards ay itinalaga bilang OIC ng Quality Assurance Section.

Kasama din sa balasahan sina Glengel Pineda na itinalaga bilang Bulacan 1st DEO OIC-Budget Unit Head at Jay-ar Mel Amazona bilang bagong OIC Procurement Unit Head.

Sa naunang kautusang inilabas noong 30 Oktubre, pinangalanan ni Dizon si Josefino Melgar bilang OIC-District Engineer ng DPWH 1st DEO.

Lahat ng posisyon na ito sa DPWH Bulacan 1st DEO ay naiwang bakante matapos ang graft and malversation charges na nai-file ni Dizon sa Ombudsman noong 11 Setyembre laban sa 20 opisyal at inhinyero ng DEO dulot ng isang maanomalyang ghost flood control project sa Bulacan. (MICKA BAUTISTA)