HATAW! D'yaryo ng Bayan hatawtabloid.com
HANDA na silang tumalon nang mataas, umikot nang mabilis, gumulong, mag-prans at sumayaw—dahil ang susunod na henerasyon ng gymnastics stars ay magpapakitang-gilas na sa 3rd FIG Artistic Gymnastics Junior World Championships na magsisimula ngayong araw sa Manila Marriott Hotel Grand Ballroom sa Newport World Resorts, Pasay City.
Bubuksan ang limang-araw na kompetisyon ng isang mala-piyestang opening ceremony sa 9:15 a.m., hatid ng Gymnastics Association of the Philippines (GAP) at suportado ng Office of the President, Philippine Sports Commission, at PAGCOR.
Si Derek Ramsey, na miyembro rin ng GAP, ang magiging host ng 30-minutong programa na magpapakilala sa 74 bansa at halos 800 gymnasts na lahat ay naghahangad na magdala ng karangalan sa kanilang mga bansa. Para sa marami sa kanila, malaking hakbang ito papunta sa mas malalaking international competitions.
Isang highlight ng opening show ang pag-awit ni Arnel Pineda ng Journey ng theme song na “Going for Gold.”
“Hindi pa tayo nagkakaroon ng ganitong kalaking international gymnastics showcase dito sa Pilipinas. Kaya iniimbitahan namin ang lahat na makisaya at panoorin sila,” sabi ni GAP president Cynthia Carrion sa press conference.
Dumalo rin sa event ang FIG President Morinari Watanabe, Secretary General Nicolas Baumpane, PSC Chairman Patrick Gregorio, PSC Commissioner Edward Hayco, at mga opisyal ng Newport World Resorts.
Ayon kay Gregorio, malaking bagay ang pagho-host ng ganitong sports events para sa turismo: “May halos 2,000 bisita na darating para sa junior worlds—ito na mismo ang sinasabi namin. Alam ’yan ni Tita Cynthia,” sabay tawa habang tinutukoy ang dating tungkulin ni Carrion sa Department of Tourism.
Unang lalaban para sa Pilipinas ang girls team na sina Sabina Tayag, Maxine Bondoc, Jellian Bantilan, at Fil-Am Elisabeth Antone. Excited silang lahat na makapag-perform sa harap ng sariling kababayan.
“Super excited po ako, lalo na’t dito sa Pilipinas ang competition,” sabi ni Bondoc, 13. “Ang saya rin na makilala ang napakaraming bagong tao.”
Bukod sa kanila, susunod na sasabak bukas ang boys team na pinangungunahan ni Karl Eldrew Yulo, kasama sina John Anthony Palles, Hilarion Yulo III, at CJ Pernia, para sa team at qualification rounds. (GAP / HNT)
