HATAW! D'yaryo ng Bayan hatawtabloid.com
Nagsagawa ng buy-bust operation ang CIDG Anti-Fraud and Commercial Crimes Unit (AFCCU) kasama ang mga kinatawan ng Mototrend Trading Corporation, katuwang ang CIDG Regional Field Unit 3 at Police Regional Office 3 na nagresulta sa pagkakumpiska ng mga kahon-kahon ng pekeng “tambutso” sa Bulacan.
Dalawang indibiduwal ang naaresto dahil sa paglabag sa Republic Act No. 8293 (Intellectual Property Code of the Philippines) sa isang bodega sa Barangay Caingin, San Rafael, Bulacan.
Nakumpiska sa operasyon ang 192 kahon ng sinasabing lumabag sa trademark na tubo ng “tambutso” ng motorsiklo na nagkakahalagang PhP 1,552,500.00.
Ayon sa ulat na nakarating kay PMGeneral Robert AA Morico II, ang acting direktor ng CIDG, ang dalawang babaeng suspek, sina “Mitch” 28 taong gulang, at “Prinsesa” 25 taong gulang, mga empleyado ng nasabing bodega, ay inaresto habang nangangalakal at nagbebenta ng mga tubo ng “tambutso” na may tatak na “MT8” – nang walang pahintulot ng may-ari nito.
Binigyang-diin ng direktor ng CIDG na pinoprotektahan at sinisiguro ng estado ang eksklusibong karapatan ng mga siyentipiko, imbentor, artista, at iba pang may talentong mamamayan sa kanilang intellectual property at mga likha, lalo na kung kapaki-pakinabang sa mga tao.
Ang mga naarestong suspek ay kinasuhan sa National Prosecution Service ng mga paglabag sa Seksyon 155 (Paglabag sa Trademark); Seksyon 168 (Unfair Trade Competition); Seksyon 169 (False Designations of Origin; False Description or Representation) ng Republic Act No. 8293 (Intellectual Property Code of the Philippines).
Pinuri ni PMGeneral Morico II ang CIDG Anti-Fraud and Commercial Crimes Unit (AFCCU) na pinamumunuan ni PLt. Colonel Rafael D Lero at mga joint operating team para sa tagumpay na ito.
Binibigyang-diin niya ang kanilang matatag na laban sa lahat ng paglabag sa batas at pagtataguyod sa mga karapatan sa intelektwal na ari-arian ng bawat may-ari ng kalakalan. (MICKA BAUTISTA)
