HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
NAGPAHAYAG ng paghanga ang pangulo ng Federation of Filipino Chinese Chambers of Commerce and Industry, Inc. (FFCCCII) sa pagiging makabayan ng ilang showbiz personalities tulad nina Vice Ganda, Catriona Gray, Sarah Geronimo, Anne Curtis, Kim Chiu at iba pa.
Ang mga nabanggit na artista ay nanguna at matapang na nagpahayag ng saloobin tungkol sa malawakang korapsyon sa flood control projects. Nakiisa rin ang mga ito sa kilos-protesta kontra korapsyon na isinagawa noong Sept. 21 sa Luneta at EDSA.
Ayon sa pangulo ng FFCCCII na si Victor Lim, “Hinahangaan namin ang katapangan at pagkamakabayan ng mga kabataang nagpapahayag para sa mabuting pamamahala.
“Ang mga personalidad sa entertainment tulad nina Vice Ganda, Sarah Geronimo, Anne Curtis, Catriona Gray, David Licauco, Dingdong Dantes, Angel Locsin, Dustin Yu, Nadine Lustre, Kim Chiu, Jodi Sta. Maria at marami pang iba ay naglalatag ng isang makabuluhang halimbawa ng pakikilahok sa lipunan.”
Samantala, binasbasan naman ni Lim ang pagdiriwang ng Mid-Autumn Festival ng panalangin para sa kapayapaan.
Nangako rin ang kanilang pamunuan na ipagpapatuloy ang paglilingkod sa mga biktima ng kalamidad at mga pampublikong paaralan.
Sa nalalapit na makulay na pagdiriwang ng Mid-Autumn Festival na magsisimula sa Oktubre 6, 2025, ipinaaabot ni Lim ang taos-pusong pagbati sa bansa, kalakip ng mga panalangin para sa kapayapaan at kaunlaran.
Kilala rin bilang Mooncake Festival, ang sinaunang pagdiriwang na ito ang pangalawang pinakamahalagang tradisyon sa kulturang Tsino, na sumisimbolo sa pagsasama-sama ng pamilya at pagpapasalamat.
Nakikiisa sa diwa ng pagdiriwang na nagbubuklod sa lahat, pinatunayan ni Lim ang matatag na pangako ng FFCCCII sa mga programa nitong corporate social responsibility.
Kabilang dito ang mga donasyon ng mga gusali para sa pampublikong paaralan sa kanayunan, pagtulong sa mga biktima ng mga kalamidad tulad ng mga komunidad na binaha dahil sa bagyo, at pagsuporta sa mga kabayanihang pagsisikap ng mga Filipino Chinese fire volunteer brigade sa buong bansa.
Mananatiling tapat ang FFCCCII sa pagpapalago ng mas matibay na ugnayan ng mga kultura at sa pag-aambag sa pag-unlad ng bansa, na isinasabuhay ang mensahe ng Mid-Autumn Festival ng pag-asa at pagbabahagi ng biyaya sa kapwa.
