Senglot naghuramentado, arestado

MABILIS na napigilan ng pulisya ang isang marahas at posibleng pagdanak ng dugo nang maghuramentado ang isang lasing na lalaki na armado ng patalim sa Brgy. Caanawan, lungsod ng San Jose, lalawigan ng Nueva Ecija, nitong Miyerkoles ng gabi, 20 Agosto.

Sa ulat mula kay P/Col. Heryl “Daguit” Bruno, provincial director ng Nueva Ecija PPO, dakong 7:20 ng gabi kamakalawa nang magwala habang nasa impluwensya ng alak ang isang 33-anyos na lalaki na na kinilala sa alyas Boy Senglot, naninirahan sa Zone 10, Brgy. Abar 2nd, s nabanggit na lungsod.

Habang armado ng kutsilyo, tinangkang saksakin ng suspek ang isang 37-anyos na tindero, na nagawang makatakas bago siya masaktan.

Patuloy na naging agresibo ang suspek at tinugis ang dalawa pang biktima—isang 21-anyos at isang 29-anyos—na kapuwa residente ng Zone 1, Bgry. Caanawan, na kapwa nakatakas bago abutan ng suspek.

Agad na tumugon sa ulat na ginawa sa pamamagitan ng opisyal na hotline ng San Jose CPS, mabilis na dumating ang mga operatiba sa lugar at kinorner ang suspek na nawala ang pagkalasing nang tuluyang arestuhin.

Narekober mula sa kanya ang kitchen knife na ginamit sa tangkang pag-atake at dinala sa himpilan ng pulisya para sa kaukulang disposisyon.

Inihahanda na ang kasong Grave Threat at Attempted Homicide para sa pagsasampa laban sa suspek sa City Prosecutor’s Office ng lungsod.

Kaugnay nito, hinimok ni P/Col. Bruno ang lahat na iwasan ang labis na pag-inom at ang mga panganib na dulot nito, dahil ang pagkalasing ay kadalasang humahantong sa mga krimen na nagbabanta sa buhay at kapayapaan na nagbibigay-diin sa patnubay ni Police Regional Office 3 Director P/BGen. Ponce Rogelio Peñones Jr. (MICKA BAUTISTA)