HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
HINDI naging hadlang ang malakas na buhos ng ulan para makapaghatid ng biyaya at saya ang SPEEd (Society of Phil. Entertainment Editors), grupo ng mga patnugot mula sa pambansang pahayagan, sa humigit-kumulang na 150 kabataan sa ginanap na SPEED Cares Outreach Program noong Linggo, Hunyo 22, 2025 sa Longos, Laguna.
Sa tulong at suporta ng ilang grupo at personalidad tulad nina Biñan, Laguna Cong. Len Alonte, Bebot Santos ng Colorete Clothing, Moises Fernandez & friends, Geraldine Jennings, LVD Management, Inc., at Federation of Filipino Chinese Chambers Commerce & Industry, Inc. (FFCCCII), matagumpay na nairaos ang ikalimang outreach program ng SPEEd sa St. John The Baptist sa Kalayaan, Longos, Laguna.
Kitang-kita sa mga mata ng mga bata, kasabay ng napakatamis na ngiti at taos-pusong pasasalamat, ang kanilang walang kapantay na saya at kasabikan habang tinatanggap ang mga damit, laruan, biscuits, at prutas na dala-dala ng mga officer at miyembro ng SPEEd.
Ikinatuwa rin ng mga bata ang simple pero masustansiyang meryenda na inihanda ng grupo para sa kanila.
Maliit na bagay para sa mga taong nakaaangat sa buhay, ngunit para sa mga batang ito na kasama pa ang kanilang mga magulang na matiyagang pumila para sa mga pasalubong ng SPEEd, malaking tuwa ang hatid nito sa kanilang puso na nag-iwan din ng marka sa kanilang isip sa kahalagahan ng pagbibigay, pagbabahagi ng ating mga biyaya, at pakikipagkapwa-tao.
Taos pusong ipinagpapasalamat ng SPEEd ang mainit na pagtanggap ng Kura Paroko ng St. John The Baptist na si Rev. Fr. Christian Abao at ng grupong CWL sa pangunguna ng dating Longos mayor na si Ms. Leni Aldaw, gayundin sa kanilang masusing pag-alalay para maging maayos at organisado ang outreach program.
Muli, ang aming taos-pusong pasasalamat sa lahat ng aming sponsors na tumulong at sumuporta para maging matagumpay ang taunang outreach program ng SPEEd.
Ang SPEEd ay mula sa pamumuno ni Ms. Salve Asis at ngayon ay nasa ikasampung taon na ng pamamayagpag nito.
