Kongreso pinarangalan Sagip Pelikula ng ABS-CBN

SHOWBIZ KONEK
ni Maricris Valdez

PINASALAMATAN ng House of Representatives ang Sagip Pelikula ng ABS-CBN para sa pagsasaayos at pagpreserba ng mga klasikong pelikulang Filipino.

Pasado sa Kamara ang House Resolution No. 2314 na kumikilala sa dedikasyon at pagsisikap ng Sagip Pelikula sa pag-restore ng 240 pelikula katuwang ang Central Digital Lab mula noong 2011.

Layon ng Sagip Pelikula na ipakilala muli sa bagong henerasyon ang mga magagandang pelikula na gawa ng mga Filipino.

Ilan sa mga pelikulang naisalba ng Sagip Pelikula ay ang Ganito Kami Noon, Paano Kayo Ngayon?(1976), Tatlong Taong Walang Diyos (1976), Himala (1982), Oro, Plata, Mata (1982), Anak (2000), Tanging Yaman (2000), at Dekada ‘70 (2002).

Ang resolusyon ay inihain nina House Speaker Ferdinand Martin Romualdez, Rep. Yedda Marie Romualdez, Rep. Christopher de Venecia, Rep. Angelica Natasha Co, Rep. Ramon Jolo Revilla III, Rep. Kristine Singson-Meehan, Rep. Bryan Revilla, Rep. Rachel Marguerite Del Mar, Rep. Rufus Rodriguez, Rep. Jefferson Khonghun, Rep. Angelo Marcos Barba, Rep. Edward Vera Perez Maceda, Rep. Jose Arturo Garcia Jr., Rep. Marlyn Alonte, Rep. Maria Rachel Arenas, Rep. Mark Go, Rep Tsuyoshi Anthony Horibata, Rep. Anna Victoria Veloso-Tuazon, Rep. Maria Angela Garcia, Rep. Maria Vanessa Aumentado, Rep. Linabelle Ruth Villarica, Rep. Richelle Singson, Rep Lianda B. Bolilia, Rep. Marissa Magsino, Rep. Lani Mercado-Revilla, Rep. Stella Luz Quimbo, Rep. Richard Gomez DPA, at Rep. Amparo Maria Zamora.

Sa isang social media post, nagpasalamat naman ang ABS-CBN Sagip Pelikula sa Kongreso sa pagkilala.

Sa pamumuno ng dating head ng ABS-CBN Film Restoration na si Leo Katigbak, kinilala ang Sagip Pelikula sa loob at labas ng bansa.  Ilan dito ay ang Gold Quill Award mula sa International Association of Business Communicators (IABC), Lifetime Achievement Award mula sa Film Development Council of the Philippines (FDCP), Film Heritage Award mula sa Society of Filipino Film Reviewers, Gawad Pedro Bucaneg mula sa Unyon ng mga Manunulat sa Pilipinas (UMPIL), at Gawad PASADO sa Pagsisinop ng mga De Kalibreng Pelikula mula sa Pampelikulang Samahan ng mga Dalubguro (PASADO).