8th The EDDYS ng SPEEd sa Hulyo, 2025 aarangkada

SHOWBIZ KONEK
ni Maricris Valdez

TIYAK na mas exciting at maningning ang 8th The EDDYS o Entertainment Editors’ Choice ngayong taon.

Ang espesyal na pagtatanghal ng ikawalong edisyon ng The EDDYS mula sa Society of Philippine Entertainment Editors (SPEEd), ay gaganapin sa Hulyo,  2025.

Ang taunang event na ito, na mula sa samahan ng mga entertainment editor sa Pilipinas, ay nagbibigay ng pagkilala at pagpapahalaga sa mga pelikula, artista at iba pang personalidad na itinuturing na pinakamagagaling sa Philippine Cinema.

Mamimigay ng 14 acting at technical awards ang SPEEd para sa 8th The EDDYS na pipiliin mula sa mga nominadong pelikula na ipinalabas sa mga sinehan at ilang digital platforms noong 2024.

Bukod sa pagkilala sa mga natatanging pelikula nitong nagdaang taon, magiging highlight din ng pinakaaabangang awards night ang pagbibigay-pugay sa bagong batch ng EDDYS Icons na itinuturing mga haligi ng movie industry.

Sila ang mga artista, direktor at iba pang personalidad na hindi matatawaran ang kontribusyon, dedikasyon, at pagmamahal sa industriya ng pelikulang Filipino sa loob ng mahabang panahon.

Ang ilan pa sa mga special award na ipamamahagi ay ang Isah V. Red Award (ang mga walang sawang tumutulong at nagbibigay inspirasyon sa mga kababayan nating nangangailangan), at ang Joe Quirino Award at Manny Pichel Award (para sa mga natatanging miyembro ng entertainment media).

Bukod dito, kikilalanin din sa gabi ng parangal ang Rising Producer of the Year at Producer of the Year.

Muli ring pararangalan ng SPEEd ang mga naging bahagi at lumaban para sa patuloy na pagbangon ng Philippine movie industry sa ikalawang taon nito – ang The EDDYS Box Office Heroes.

Bibigyang-pugay nito ang mga pangunahing artista na bumida sa highest-grossing films sa bansa na naging daan upang muling sumugod sa sinehan ang mga manonood at manumbalik ang sigla ng pelikulang Filipino.

Abangan ang iba pang mga detalye tungkol sa inaabangang 8th The EDDYS mula sa SPEEd sa Hulyo.

Ang SPEEd ay binubuo ng mga current at former entertainment editors ng mga leading broadsheet, top tabloid newspaper, at online portals sa Pilipinas.