Wanted sa Bulacan, arestado sa Caloocan

NALAMBAT ng Caloocan police ang isang 33-anyos akusado na wanted sa kasong pagpatay sa Bulacan matapos ang ikinasang operasyon sa Caloocan City, kamakalawa ng hapon.

Sa report na nakalap mula sa tanggapan ni Northern Police District (NPD) District Director P/BGen. Josefino Ligan, nagtago ang akusado kinilala bilang alyas Tata, wanted sa lalawigan ng Bulacan, dahil sa kasong pagpatay.

Nakakuha ng kopya ng arrest warrant ang mga tauhan ng District Special Operations Unit (DSOU) na inilabas ni Malolos City Regional Trial Court (RTC) Presiding Judge Gorgonio Balbastro Elarmo, Jr., ng Branch 77.

Sa ikinasang manhunt operation ng mga operatiba ng NPD-DSOU, naaresto ang akusado bandang 4:00 pm kamakalawa sa F. Miramonte Park Subdivision, West Brgy. 180, North Caloocan.

May inilaang piyansa ang hukuman na P120,000.

Kasalukuyang nasa pangangalaga ng NPD Custodial Facility Unit sa Kaunlaran Village ang suspek, habang hinihintay ang ilalabas na commitment order ng hukuman para sa paglilipat sa kanya sa Malolos City Jail. (VICK AQUINO)