Taipower nagpasiklab sa pagbubukas ng AVC

Mga Laro sa Lunes
(Philsports Arena)

10 am – VTV Binh Dien Long An vs Baic Motor (Pool C)
1 pm – Nakhon Ratchasima vs Queensland (Pool D)
4 pm – Petro Gazz vs Taipower (Pool B)
7 pm – Zhetysu vs Creamline (Pool A)

KAOHSIUNG — Hindi na nagpatumpik-tumpik pa ang Taipower sa pagbubukas ng 2025 AVC Women’s Club Volleyball Championship matapos nilang durugin ang koponang Hip Hing ng Hong Kong sa iskor na 25-10, 25-16, 25-14, Linggo ng umaga sa Philsports Arena sa Pasig.

Ipinamalas ng siyam na beses na kampeon ng Top Volleyball League mula Taiwan ang kanilang karanasan at lakas, tinambakan ang kasalukuyang kampeon ng Hong Kong Women’s Volleyball League para maagaw ang maagang liderato sa Pool B na may 1-0 record.

Pinangunahan ni Peng Yu-Rou ang opensiba ng Taipower na may 16 puntos mula sa 15 kills. Sumunod si Tsai Yu-Chun na may 11 puntos, kabilang ang walong spike.

Nag-ambag din si Hsu Wan-Yun ng pito, habang si team captain Huang Ching Hsuan ay nagtala ng anim na puntos. Sina middle blockers Hu Xiao-Pei at Pao Yin-Chi ay may tig-limang puntos para sa balanseng opensa ng koponan.

“Napakahalaga para sa akin bilang volleyball player na makaranas ng ganitong klase ng torneo. Importante rin na ang buong team ay magkaroon ng karanasan sa mga ganitong paligsahan,” pahayag ng starting setter na si Hung Chia-Yao, na may dalawang puntos at 10 excellent digs.

Kumontrol ang Taipower sa ikatlong set matapos makalamang ng 14-6. Sunod-sunod na atake—isang crosscourt kill mula kay Hsu, isang mabilis na set kay Lin, panibagong bombang spike ni Hsu, at isang mabilis na palo mula kay Hu—ang nagpalaki ng lamang sa 21-10.

Tinapos ng isang off-speed hit ni Hsu at dalawang down-the-line attack ni Peng ang matikas na debut ng Taipower sa walong araw na paligsahan na suportado ng Mikasa, Mizuno, at Grand Sport bilang mga katuwang ng AVC.

Kahit na dominante na sa unang set, hindi bumitaw ang Taipower. Mula sa manipis na 9-6 kalamangan sa ikalawang set, naging 19-10 ito, pinigilan ang pagbawi ng Hip Hing.

“Bagong karanasan ito para sa amin, at marami kaming matututuhan sa ibang bansa — pati na rin sa paraan ng laro nila at sa aming komunikasyon,” ani Hu matapos ang laro na tumagal nang isang oras at apat na minuto. Ang torneo ay sinuportahan din ng mga lokal na partner tulad ng PLDT, MWell, Eagle Cement, Rebisco, Akari, Gameville, PNVF, PSC, Cignal, at The Look Group.

Muling sasabak sa aksyon ang Taipower sa Lunes, 4 p.m., laban sa mga kampeon ng 2024-25 PVL All-Filipino Conference na Petro Gazz.

Walang manlalaro mula sa Hip Hing ang umabot nang double digits. Pinangunahan ni Pang Wing Lam, isang outside hitter, ang scoring ng Hong Kong team na may pitong puntos, habang si setter Fung Tsz Yan ay may apat.

Patuloy na naghahanap ng unang panalo, susubukan ng Hip Hing na bumawi laban sa Petro Gazz sa Martes, 7 p.m. (HNT)