Jaclyn Jose binigyang pugay sa “In Memoriam“ ng Oscars 2025 

SHOWBIZ KONEK
ni Maricris Valdez Nicasio

BINIGYANG-PUGAY sa katatapos na 97th Academy Awards sa kanilang “In Memoriam” ang yumang award-winning actress na si Jaclyn Jose kasama ng iba pang mga kilalang celebrities.

Kabilang sa mga ibinahaging pictures sa Oscars awards night para sa kanilang “2024-2025 In Memoriam” ang mga pumanaw na Hollywood personalities na sina Gene Hackman, Maggie Smith, Gena Rowlands, Michelle Trachtenberg, Shannen Doherty, at Olivia Hussey.

“The Academy honors friends and colleagues we lost over the last year. Take a moment to remember the artists and filmmakers we lost in 2024-2025,” caption ng post ng Oscars sa kanilang official social media account.

Pinasalamatan ito ni Andi Eigenmann kaya naman sa kanyang Instagram post, ibinahagi nito ang screenshot mula sa Oscars website. Naroon ang ang pangalan at picture ni Jaclyn kasama ang iba pang artistang pumanaw nitong nakaraang taon.

Caption ni Andi, “My nanay is among other Hollywood artists and filmmakers who are remembered by The Academy this year.”  

Namatay si Jaclyn sa loob ng kanilang bahay sa Quezon City dahil sa heart attack sa edad na 60. noong March 3, 2024.  Lalong nagningning ang husay ni Jaclyn nang magwaging Best Actress sa 2016 Cannes Film Festival para sa pagganap niya sa pelikulang Ma’Rosa ni Brillante Mendoza.