HATAW! D'yaryo ng Bayan hatawtabloid.com
HATAW News Team
DINAKIP ng mga awtoridad ang isang 39-anyos lalaki matapos akusahan ng panggagahasa sa isang 14-anyos junior high school student na nobya ng kanyang anak sa Binondo, Maynila.
Kinilala ng Manila Police District (MPD) ang suspek na si alyas Dencio, 39 anyos, residente sa nabanggit na lugar.
Ayon kay MPD Director P/BGen. Thomas Arnold Ibay, naaresto ang suspek sa mabilis na ikinasang follow-up operation na pinangunahan ng MPD Delpan Police Station 12.
Ayon sa menor de edad na biktima, naganap ang insidente ng pang-aabusong seksuwal nang makitulog siya sa bahay ng kaniyang nobyo na anak ng suspek.
Nagising umano siya dakong 2:00 ng madaling araw na may ginagawang hindi maganda sa kaniya ang ama ng kaniyang kasintahan.
Nagawa niyang makatakas at umuwi upang magsumbong sa mga magulang.
Dinala siya ng kaniyang mga magulang sa estasyon ng pulisya upang magsampa ng reklamo.
Agad nagkasa ang mga tauhan ng MPD ng follow-up operation na nagresulta sa pagkakadakip sa suspek.
Kasalukuyang nasa kustodiya ng pulisya ang suspek at nahaharap sa kasong paglabag sa RA 8353 o Anti-Rape Law of 1997.
