HATAW! D'yaryo ng Bayan hatawtabloid.com
SA WALANG TIGIL na pagsusumikap at paglaban sa ilegal na droga sa Central Luzon, matagumpay na naaresto ng mga operatiba ng PRO3 ang tatlong drug suspects sa magkakahiwalay na buybust operation sa mga lalawigan ng Bulacan at Pampanga, na humantong sa pagkakakompiska ng 105 gramo ng hinihinalang shabu na tinatayang nagkakahalaga ng P700,000.
Isinagawa ang unang operasyon noong nakaraang Miyerkoles, 5 Pebrero, dakong 8:00 pm sa Towerville, Brgy. Gaya-Gaya, lungsod ng San Jose del Monte, sa lalawigan ng Bulacan.
Inaresto ng mga anti-illegal drug operatives mula sa San Jose del Monte CPS, sa pakikipag-ugnayan sa Philippine Drug Enforcement Agency (PDEA), ang suspek na kinilalang si alyas Jay-ar, 42 anyos, tubong-Iloilo at residente sa nasabing lugar.
Nakuha mula sa suspek ang dalawang heat-sealed transparent plastic sachet na naglalaman ng 50 gramo ng hinihinalang shabu, tinatayang nagkakahalaga ng P340,000, kasama ang marked P500 bill na ginamit sa transaksiyon.
Wala pang 24 oras, dakong 7:30 ng gabi noong Huwebes, 6 Pebrero, isa pang buybust operation ang isinagawa malapit sa Tres Marias Resort, Brgy. Cutud, lungsod ng Angeles, lalawigan ng Pampanga.
Inaresto ng Angeles City Drug Enforcement Unit (ACDEU) at Angeles CPS Station 3 ang dalawang high-value target (HVIs) na kinilalang sina alyas Caloy, 40 anyos, residente ng Sto. Domingo, Angeles; at alyas Bok, 34 anyos, isang air-conditioning technician mula Capas, Tarlac.
Nakompiska mula sa mga suspek ang 55 gramo ng hinihinalang shabu na tinatayang nagkakahalaga ng P374,000.
Nahaharap ngayon ang mga naarestong suspek sa kasong paglabag sa RA 9165 o Comprehensive Dangerous Drugs Act of 2002.
Hinikayat ni PRO3 Regional Director P/BGen. Jean Fajardo ang publiko na aktibong suportahan ang pagsusumikap ng PNP laban sa droga sa pamamagitan ng pag-uulat ng mga kahina-hinalang aktibidad sa pinakamalapit na estasyon ng pulisya o opisyal na mga hotline. (MICKA BAUTISTA)
