Sa FPJ Panday Bayanihan: Interes ng tanod unahin

PARA sa mga tagapagtaguyod ng FPJ Panday Bayanihan partylist group, higit na angkop isulong ng Kongreso ang interes ng mga tanod na matiyagang nagbabantay sa mga komunidad para tiyakin ang kapayapaan sa barangay.

Sa isang kalatas, partikular na tinukoy ng grupong FPJ Panday Bayanihan ang kawalan ng sahod at benepisyo ng hindi bababa sa isang milyong tanod mula sa 42,046 barangay sa iba’t ibang panig ng bansa.

Bagamat may “allowance” na natatanggap kada buwan, karaniwan anilang hindi sapat para makabuhay ng pamilya, lalo pa’t patuloy ang pagtaas ng presyo ng mga pangunahing bilihin sa merkado.

Wala rin umanong benepisyong nakalaan sa mga tagapamayapa ng komunidad dahil hindi naman pasok sa kategorya ng “empleyado” ang mga tanod.

Mungkahi ng FPJ Panday Bayanihan partylist sa Kongreso, gawing regular at bigyan ng karampatang sahod at angkop na benepisyo ang mga barangay tanod na karaniwang binibigyan lang ng P1,000 allowance kada buwan.

Ayon kay Kapitan Reil Briones ng Barangay Talao-Talao sa Lucena City, halos isang libo lang ang allowance ng tanod kada buwan at insurance coverage.

Pag-amin naman ni Randy De Silva na nagsisilbing tanod sa Barangay San Pablo, Binalonan Pangasinan, “halagang P1,200 ang allowance namin kada buwan. May natatanggap na bigas tuwing may ayuda lang.”

Sa isang bukod na pahayag, nanindigan si Brian Poe Llamanzares na tumatayong first nominee ng FPJ Panday Bayanihan partylist — “Hindi biro ang responsibilidad ng mga tanod na aniya’y nagpapatupad ng batas at kaligtasan ng mga residente sa nasasakupang barangay. Nararapat lamang na sila’y makatanggap ng pagkalinga mula sa pamahalaan.”

Sa ilalim ng Memorandum Circular 2003-42 ng Department of the Interior and Local Government (DILG), pasok ang mga barangay tanod sa kategorya ng tinatawag na “law enforcers.”

Mandato ng mga tanod na tiyakin ang kaayusan at kapayapaan sa komunidad sa paraan ng pagroronda (araw at gabi) para sa crime prevention, magsilbing katuwang ng lokal na pulisya sa pagtunton ng “missing persons,” pagtugis sa mga kriminal at paghahain ng mandamiento de arresto.

Trabaho rin ng mga tanod na itawag sa pulisya ang kahit anong gulo, kahina-hinalang kilos bago pa man mangyari ang krimen, pagresponde sa kalamidad at tawag ng saklolo, at iba pa.

Bagamat may mga mungkahing naglalayong itaas ang antas ng pamumuhay ng mga tanod, nananatiling tulog ang panukala sa Kongreso – kabilang ang Senate Bill No. 2, na inihain noong 2007. Target ng naturang panukalang amyendahan ang Republic Act 7160 (Local Government Code of 1991).

Sa ilalim ng naturang panukala, target itaas ang allowance ng mga tanod mula P2,000 hanggang P5,000, bukod sa hazard pay na maglalaro mula P1,000 hanggang P2,000 kada buwan, 20 hanggang 50 kilong rice subsidy at buwanang transportation allowance mula P500 hanggang P1,000.

Hirit ng FPJ Panday Bayanihan partylist group, kilalanin ang mahalagang papel na ginagampanan ng mga barangay tanod sa pagpapanatili ng kapayapaan at kaayusan ng komunidad.

Dapat rin anilang bigyan ng kasiguruhan sa trabaho ang mga tanod sa bisa ng paglikha ng plantilla position imbes co-terminous status o wala nang trabaho sa pagtatapos ng termino ng barangay chairman.

Pasok din sa isusulong ng FPJ Panday Bayanihan partylist group ang free legal assistance bilang proteksiyon mula sa pandarahas at panggigipit ng mga prominenteng taong natitisod sa pagpapatrolya.