HATAW! D'yaryo ng Bayan hatawtabloid.com
AABOT sa tinatayang P3,300,000 halaga ng mahahalagang gamit ang natangay mula sa isang retiradong empleyado nang looban ng isang magnanakaw ang kaniyang bahay sa Brgy. Bulakin, bayan ng Tiaong, lalawigan ng Quezon, nitong Linggo, 12 Enero.
Kinilala ng pulisya ang biktimang si alyas Ramon, 69 anyos, isang retiradong empleyado.
Lumalabas sa imbestigasyon na nadiskubre ng biktima na siya ay nanakawan nang matagpuan ang dalawang bag na kinalalagyan ng kaniyang mahahalagang gamit sa labas ng kaniyang bahay.
Nang kaniyang inspeksiyonin ang mga bag, nabatid niyang nawawala ang mga laman nitong mga gintong alahas, at mga relong may tatak na Rolex, Movado, Shinola, at Coach.
Ipinaalam ng biktima sa security ang insidente na siyang nag-ulat nito sa pulisya.
Ayon sa pulisya, nakapasok ang suspek sa loob ng bahay ng biktima sa pamamagitan ng pagdaan sa isang maliit na bintana sa likuran.
Patuloy ang isinasagawang imbestigasyon ng mga awtoridad upang matukoy ang pagkakakilanlan at lokasyon ng suspek.
