HATAW! D'yaryo ng Bayan hatawtabloid.com
BINAWIAN ng buhay ang dalawang lalaki na pinaniniwalaang pinagbabaril ng hindi kilalang suspek habang nakatayo sa isang waiting shed sa Brgy. Lutucan, bayan ng Sariaya, lalawigan ng Quezon, nitong Sabado ng gabi, 5 Oktubre.
Kinilala ang mga biktimang sina Bernardo Maranan, alyas Tibor; at June Regalado, alyas Asim, na natagpuan ng mga nagrespondeng pulis na may mga tama ng bala ng baril sa kanilang mga katawan sa Sitio Mangga, sa nabanggit na barangay, dakong 8:30 pm kamakalawa.
Ayon kay P/Lt. Col. Carlo Caceres, hepe ng Sariaya MPS, nakalaya si Maranan mula sa police custodial facility para sa kaso kaugnay ng droga dahil sa plea bargaining agreement.
Ani Caceras, tinitingnan nila ang anggulong onsehan sa droga bilang motibo sa pamamaslang.
Kagagaling umano ng mga biktima sa kanilang bahay na magkaangkas sa motorsiklo nang makasalubong ang isang tao sa madilim na bahagi ng tabing kalsada.
Ilang minuto ang nakalipas, dumating ang gunman na sakay ng isang motorsiklo at pinagbabaril ang mga biktima gamit ang kalibre .45 baril na naging sanhi ng kanilang agarang pagkamatay.
Patuloy ang isinasagawang imbestigasyon upang matukoy ang pagkakakilanlan ng mga responsable sa krimen. (BOY PALATINO)
