HATAW! D'yaryo ng Bayan hatawtabloid.com
UMABOT sa P30,391,322 halaga ng ilegal na droga ang nakompiska ng Quezon City Police District (QCPD) sa 576 anti-illegal drug operations mula Abril hanggang Hunyo 2024 sa lungsod, ayon sa ulat kahapon.
Ayon kay Quezon City Police District (QCPD) Director, P/BGen. Redrico A. Maranan, ito ay malaking pagtaas kompara sa parehong panahon noong nakaraang taon, kung saan 509 operasyon ang isinagawa, na nagresulta sa pagkakaaresto ng 883 suspek at pagkakakompiska ng P23,558,170.80 halaga ng ilegal na droga.
Kabilang sa mga nakuhang substance ay marijuana kush, at shabu.
Nanguna ang District Drug Enforcement Unit (DEU), na nagsagawa ng 15 operasyon, na nagresulta sa pagkakaaresto ng 22 suspek at pagkakakompiska ng P5,807,200 halaga ng ilegal na droga.
Sinundan ito ng Batasan Police Station (PS 6), na nagsagawa ng 86 operasyon, na humantong sa pagkakaaresto sa 134 suspek at pagkakasamsam ng P5,555,996 halaga ng ilegal na droga.
Malaki rin ang kontribusyon ng Novaliches Police Station (PS 4) sa 78 operasyon, na nagresulta sa pagkakaaresto sa 108 suspek at pagkakasamsam ng P3,071,574 halaga ng ilegal na droga.
Lahat ng mga naarestong suspek ay kinasuhan ng mga paglabag sa RA 9165, ang Comprehensive Dangerous Drugs Act of 2002. (ALMAR DANGUILAN)
