HATAW! D'yaryo ng Bayan hatawtabloid.com
DALAWA mula sa 165 entries ang itinanghal na kampeon sa ikalawang edisyon ng 2024 World Slasher Cup 9-Cock Invitational Derby na ginanap sa makasaysayang Smart Araneta Coliseum nitong nakaraang 22 Mayo hanggang 28 Mayo 2024.
Nagkampeon kapuwa ang Mulawin entry ni Frank Berin at ang combined entry nina Mike Romulo at Owen Medina (GTT Tonio) matapos makapagtala ng tig-walong panalo at isang talo sa pagtatapos ng huling round ng nasabing torneo.
Pasok sa runner-up ang combined entry nina Joemarie Bantillo/Nico Rodelas/Re Arenas (Winstar & Company) makaraang makasungkit ng pitong panalo, isang talo at isang tabla.
Maituturing na masuwerte ang numero 7 sa tig-pitong panalo at dalawang talo nina Rey Briones/Tony Kho, Dicky Lim/Darryl Andrew Lim, Jessie Viceo, Patrick Antonio/Bebot Uy, Biboy Enriquez, Balong/RSF, at Presly De Jesus sa pagtatapos ng laban.
Anim na panalo, dalawang talo at isang tabla ang kay Conrad Siochi, habang tig-anim na panalo at tatlong talo sina Raymond Dela Cruz, Dante Slavon/Matt Hachuella, James Rabano/Boy Jimenez, Bulldog, Pulong Duterte/JD at JJC/Carrie Chua.
Umabot sa 165 entries mula sa mga bigating sabungero mula sa iba’t ibang panig ng mundo ang sumali para sa ikalawang edisyon ng World Slasher Cup ngayong taon na ginanap nitong 22-28 Mayo.
Sa kasaysayan, naganap ang unang derby sa Smart Araneta Coliseum noong 1963, ang World Slasher Cup ay ang pinakamalaki at pinakaprestihiyosong international cock derby dahil hindi lamang ang pinakamagagaling na breeder at sabungero mula sa Filipinas ang lumalahok dito kundi pati ang mahuhusay mula sa ibang bansa.
