HATAW! D'yaryo ng Bayan hatawtabloid.com
MA at PA
ni Rommel Placente
NAGING isyu para sa ilang netizens ang paghuhugas ni Jessa Zaragoza ng mga pinggan habang kuntodo-make up at bini-video ng anak nila ni Dingdong Avanzado na si Jayda.
Tanong ng ilang bashers, kailangan daw ba talaga na naka-make up pa si Jessa kapag naghuhugas ng mga pinagkainan? Parang nagpapapansin lang daw ang singer-actress.
Sa isang panayam, ipinagtanggol ni Jessa ang sarili. Ipinaliwanag niya kung bakit naka-make -up siya habang naghuhugas ng mga pinggan.
“Ayun na nga! Ano kaya kung maghugas ako ng pinggan tapos mayroon akong mga diamond, ‘di ba? Baka may masabi na naman sila. Ha-hahaha!” natatawang umpisang sabi ni Jessa.
Katwiran pa ni Jessa, “Kasi, ‘di ba, pinapahula niya (Jayda) ‘yung lyrics ng kanta niya sa akin? Eh, kasi, hindi naman ‘yun planado.
“Bigla na lang na-ambush ako habang naghuhugas ng pinggan. Wala naman kaming katulong or helper sa bahay.
“Galing ako sa show niyon. Nag-event kami sa St. Luke’s yata. Tapos, siyempre, ganoon ako talaga kahit sa Amerika.
“Pagkababa ng kotse, hindi muna ako magtatanggal ng mga make-up. Hindi ako nakapagbihis, diretso sa kusina, hugas agad ng pinggan, kung ano man ‘yung naiwanan ko roon,” esplika pa niya.
Ibig sabihin, hindi ‘yun ang first time na ginawa niya ‘yun at hindi naman talaga niya sinadya “Ay, hindi! Hindi. Hindi pinagplanuhan iyon. Talagang ano, organic.
“And I’m sure maraming mga working mom ang nakare-relate. Kasi siyempre naman, gusto kong maglinis na ng katawan, magtanggal ng make-up, ‘pag tapos na lahat ‘yung gawain ko.
“At saka ako aakyat para hindi na ako pagpapawisan pa ulit,” aniya pa.
Sa tanong kung ano ang feeling niya kapag may mga namba-bash sa kanya ng dahil sa isang simpleng video.
“Alam mo, sa totoo lang, ewan ko, ‘yung mga taong nakakakilala sa akin, matagal ako bago maasar talaga ng bonggang-bongga.
“Isa ako sa mga deadma talaga. So, kapag sumasagot ako na ganoon, hindi ibig sabihin, napipikon ako.
“Parang… ‘Ahh, ganoon? Gusto mong maglaro? Laro tayo!’ Ha-hahaha!
“Inano ko lang. Sinabihan ko lang din, in-explain ko lang. Para ngang biniro-biro ko pa, ‘Okay na ba sa iyo ang explanation ko? Malinaw na ba?’ Ha-hahahaha! Hindi naman seryoso ‘yun,” sabi pa ni Jessa.
