HATAW! D'yaryo ng Bayan hatawtabloid.com
KINASUHAN kahapon ng transport group na MANIBELA ang mga opisyal ng Department of Transportation (DOTr) kaugnay ng pagbawi ng prangkisa sa mga unconsolidated public utility vehicles (PUVs).
Sa reklamong inihain sa Office of the Ombudsman, sinabi ni MANIBELA president Mario Valbuena na nilabag ng mga opisyal ang Constitution and Anti-Graft and Corrupt Practices Act sa pagsusulong ng PUV Modernization Program.
Nanawagan din siya sa pagsasampa ng mga kasong kriminal laban sa mga opisyal ng DOTr at ang kanilang preventive suspension.
Kabilang sa mga kinasuhan sina DOTr Secretary Jaime Bautista, Office of Transport Cooperatives (OTC) chairperson Ferdinand Ortega, at Land Transportation Franchising and Regulatory Board (LTFRB) chairperson Teofilo Guadiz III at ang kaniyang board membes na sina Egineer Liza Marie Paches, Atty. Mercy Jane Paras Leynes at Atty. Robert Peig.
Kasama din si Solicitor General Menardo Guevarra sa inireklamo ng MANIBELA dahil ipinagtatanggol umano nito ang mga opisyal ng DOTr sa halip na sabihan silang sumunod sa Konstitusyon.
“Neither did the DOTR and LTFRB conduct any consultation among the affected sectors, especially the PUV drivers and operators like the members of complainant MANIBELA and the undersigned Complainant,” ayon kay Valbuena.
Sa ilalim ng Memorandum Circular No. 2023-051, ang mga PU holders at drives ay kinakailangang magsama-sama sa mga kooperatiba upang hindi awtomatikong mabawi ang kanilang prangkisa pagsapit ng Disyembre 31, 2023.
At kung ang mga unconsolidated na PUV unit na ito ay bumiyahe at kukuha ng mga pasahero, aarestuhin sila ng ahensya, ayon kay Valbuena.
Giit ng grupo, ang transport modernization ay malinaw na pagpabor lamang sa mga imported na modern jeepney sa halip na sa mga lokal na manufacturers
Una nang pinalawig ni Pangulong Ferdinand “Bongbong” Marcos Jr. ang deadline para sa konsolidasyon hanggang Abril 30, 2024.
Nabatid na nitong Enero 5, aabot na sa 73 porsyento ng mga jeepney sa bansa ang nag-consolidate para sa programa. (ALMAR DANGUILAN)
