HATAW! D'yaryo ng Bayan hatawtabloid.com
KUMABIG ang Swimming League Philippines (SLP) -Philippine Team ng kabuuang 10 medalya, tampok ang apat na ginto kabilang ang tatlo mula sa top performer na si Richard Nielson Navo sa katatapos na Hong Kong Stingrays Summer Sizzler invitational swimming championship sa Hong Kong Olympic Swimming pool.
Humirit ang 15-anyos na si Navo, pambato ng South Warriors Swimming Team, sa boys 15-under class 50m backstroke sa ti8yempong 31.73 segundo, gayondin sa 100m breaststroke (1:19.83) at 50m freestyle (27.75) para pangunahan ang koponan na binuo mula sa serye ng mga torneo ng Swim League Philippines (SLP), sa pagtataguyod ng Ang Lechon Manok ni Sr.Pedro, Mary Grace Café, Lorins Patis, Lorenzana Corporation, Blueresca Angels, at MFV Architectural Design and Services.
Dinugtungan ni Raina Samantha Leyran, Palarong Pambansa qualifier ngayong taon, ang ratsada ni Navo matapos pagbidahan ang girls 13 & over 15-under 50m butterfly sa tiyempong 30.04 segundo. Nasungkit din niya ang bronze medal sa 50-m back at bahagi ng 200m girls medley relay (bronze) at 200m mixed medley relay.
Nag-ambag si Kendra Beatrice Larrobis ng Cavite Sea Beast Swimmimg Team ng isang silver sa girls 14-over 50-m butterfly.
“Masayang-masaya kami dahil sa ipinakitang determinasyon ng ating mga batang swimmers. Hindi matatawaran ang karanasan na nakuha ng mga bata rito at ang mga medalyang napagwagihan and nagpadoble sa kasiyahan ng buong delegasyon,” pahayag ni team head delegation coach Marlon Dula.
Humirit ng bronze medal si Hannah Magale sa girls 14 years old 50m breast para madagdagan ang nakamit na silver medal sa 200m girls medley relay; dalawang bronze ang naiuwi ni Elijah Ebayan sa boys 14 years old 50m fly at 50m back; kumana si Marc Bryan Dula ng bronze sa boys 16 years old 200m mixed medley relay; bronze si Feriz Gabriel Espano sa 15 years old 50m back. (HATAW Sports).
