Problema sa kaligtasan sa lansangan ng mga batang Pinoy dapat tugunan

DAPAT matugunan ng gobyerno ang problema sa kaligtasan sa lansangan ng mga batang Filipino.

Ginunita ng Department of Transportation (DOTr) ang National Day of Remembrance for Road Traffic Victims, Survivors, and their Families, bilang paalala sa mga responsibilidad sa kalsada sa pagpapanatiling ligtas sa mga lansangan para sa mga bata at sa mga gumagamit nito.

Ayon kay Transportation Undersecretary Mark Steven Pastor, nilikha ang National Coalition for Child Traffic Injury Prevention na pinamumunuan ng (DOTr) concerned government agencies, NGOs, academe, private sector, at civil society groups para matiyak na matutugunan ng gobyerno ang problema sa kaligtasan sa kalsada at matiyak na ligtas sa panganib ang lahat ng mga batang Filipino.

Sinabi ni MMDA Chairman Romano Artes susuportahan ng ahensiya ang mga adbokasiya na magpoprotekta sa mga bata sa mga kalsada sa buong bansa.

Dagdag ni Artes, bahagi ng adbokasiya ng MMDA ay magbibigay aral at suporta sa mga bata para maging ligtas ang kanilang pagtawid sa kalsada.

Base sa inilabas na datos, 12,000 Pinoy ang namamatay sa mga road crash kada taon, 1,670 dito ay mga bata.

Ayon Kay Usec. Pastor, ang mga kabataang ito ay maaaring mga susunod na abogado, doktor, senador o posibleng susunod na Presidente, kaya’t obligasyon ng concerned government agencies at bawat isa na tiyakin ang kaligtasan ng komunidad hindi lamang sa mga bata kundi para sa lahat. (GINA GARCIA)