HATAW! D'yaryo ng Bayan hatawtabloid.com
HARD TALK
ni Pilar Mateo
MAY ilang mga bagay na dapat ikonsidera kung ikaw ay sasalang sa pelikula ng mahusay at premyadong direktor na si Joel Lamangan.
Ayaw na ayaw nito sa TANGA!
“’Yun ang pinaka-mahirap. Walang cure! ‘Yung nagkukunwari na alam niya, ‘yun ag pinagagalitan ko. ‘Yun sa akin ang tanga.
“Napakahirap naman ‘ata na umabot ng take 24. Kapag ganoon, kinakausap ko na lang. Magagalit ka na nga. Mahihiya ka pa sa producer sa ginagastos niya sa pelikula.
“Marami naman ang may alam na isa pang ayaw na ayaw ko eh, ‘yung nale-late sa call nila. Umaga ang call time, 8:00 a.m. alas dose ng tanghali dumarating. ‘Yung iba 4:00 p.m. pa dumarating. Hahabulin ko talaga sila ng saksak. Kasi ang daming napeperhuwisyo. Sinusuwelduhan din lang ako roon. Kaya dapat alam ko mag-control.
“Kung magaling naman, sasabihin ko naman. Kung hindi eh, doon na makakatikim sa akin. Isa pang ayaw na ayaw ko eh ‘yung mga mapagmataas sa mga kasamahan sa trabaho. Ayoko ng hindi marunong makisama sa mga tao.
“Lahat naman ng ‘yan, bago pa magsimula ang shoot, alam na nila. Dahil kinakausap ko naman sila.”
Pero roon na rin nagsimula ang notion na kapag naman daw natarayan o natalakan nito ang isang artista eh, sumisikat ito.
“Kaya dapat na matakot sila sa akin. Kasi, kung hindi ko sila pansinin, ibig sabihin lang niyon wala akong pakialam at hindi kayo nag-e-exist sa akin. Eh, ang bunganga ko, kung ano-ano ang lumalabas. ‘Pag tinarayan ko, may potensiyal ‘yun.”
Sa Disyembre, isa sa aababgang panoorin ang kanyang My Father, Myself sa Metro Manila Film Festival. Hindi pa man eh, napaka-ingay a pinag-uusapan ang pelikulang may kontrobersiyal ang tema.
At kamakailan, muling humarap sa press si Direk Joel para sa storycon ng bago niyang sisimulan sa 3:16 Media Networks at Mentorque Productions, ang Sa Kanto ng Langit at Lupa na magtatampok muli kay Sean de Guzman.
Ito ay mula sa panulat ng Cinemalaya 2023 Best Director na si Ma-An L. Asuncion-Dagñalan (Blue Room) kasama ang kabiyak ng pusong si Michael.
Kasama ni Sean sa cast sina Royce Cabrera, Quinn Carrillo, Rob Guinto, Marco Gomez, Jiad Arroyo at marami pa.
Natakot ba ang mga bagong makakasama ni direk Joel sa pelikula? O naging isang malaking hamon ito sa mga baguhan?
