HATAW! D'yaryo ng Bayan hatawtabloid.com
PORMAL na nilagdaan ni Philippine Sports Commission (PSC) Chairman Jose Emmanuel “Noli” Eala at Province of Ilocos Sur Governor Jeremias “Jerry” Singson ang memorandum of agreement (MOA) para sa pagtatanghal ng 2022 Batang Pinoy National Championships nitong nakaraang Huwebes sa PSC Conference room sa Rizal Memorial Sports Complex, Maynila.
Ang multi-sports grassroots program ng PSC ay nakatakda sa 17-22 Disyembre 2022 sa Vigan, Ilocos Sur.
“I am very honored na kasama natin ngayon si Gov. Jerry Singson. Ang 2022 Batang Pinoy National Championship ay talagang magiging kauna-unahang major PSC-organized competition sa ilalim ng aking panunungkulan at kaya naman labis kong ikinararangal na gawin ito sa lalawigan ng Ilocos Sur kung saan nanggaling ang mga Ealas,” ani Eala.
“Isang karangalan at pagmamalaki naming mag-host ng Batang Pinoy 2022 at ang Lalawigan ng Ilocos Sur ay nasasabik nang ipahayag ko na sa wakas ay magho-host na kami ng Batang Pinoy. Nagpapasalamat po ako kay Chairman Eala that he accepted and chose us to host Batang Pinoy 2022. Malaking bagay po ito sa amin because through sports, makikilala na naman po ang Ilocos Sur and hopefully mabubuhay muli ang aming ekonomiya at turismo,” saad ni Gov. Singson.
Dumalo rin sa ceremonial signing sina PSC Executive Director Atty. Guillermo Iroy, Jr., Province of Ilocos Sur Executive Assistant, Atty. Jannah Singson, Provincial Administrator Marlon Tagorda, Special Assistant to the Governor in Sports Jester Singson at PSC Regional Coordinator Edwin Llanes.
“Talagang ipinagmamalaki ko na sa wakas ay babalik na ang Batang Pinoy National Championship sa Probinsiya ng Ilocos Sur na magho-host ng kompetisyong ito ay isang malaking hakbang tungo sa pagsulong ng ating grassroots program at pagsisimula ng grassroots program sa Philippine Sports Commission,” diin ni Eala.
Unang pagkakataon ito na babalik sa aksiyon ang Batang Pinoy National Youth Games pagkatapos ng COVID-19 pandemic.
Makatutulong ito sa mga student-athletes at out-of-school youth na may edad 10-15 anyos, na nagmula sa 81 probinsiya at 144 lungsod sa buong bansa.
May kabuuang 17 sports ang kasama sa programa ngunit siyam lamang – archery, athletics, badminton, chess, cycling, table tennis, swimming, weightlifting, at obstacle course racing (demonstration) ang paglalabanan sa face-to-face competitions.
Isasagawa bilang virtual contests ang walong disiplina tulad ng arnis, dancesport, judo, karate, muay, pencak silat, taekwondo at wushu.
May kabuuang 1,995 medalya – 600 ginto, 600 pilak at 795 tanso – ang nakataya sa 6 araw na sportsfest.
Tinatayang 7,000 ang delegado na kinabibilangan ng mga atleta, coaches, at mga opisyal, ang inaasahang lalahok sa centerpiece program ng PSC para sa grassroots sports. (HATAW Sports)
