Natagpuang bangkay ng teenage lady biker kinilala ng 62-anyos ama

KINILALA ng kanyang sariling ama ang lady biker na unang iniulat na nawawala at natagpuan ang katawan sa madamong bahagi ng  Bypass Road, sa Brgy. Bonga Menor, bayan ng Bustos, sa lalawigan ng Bulacan nitong Biyernes, 12 Agosto.

Kinilala ng kanyang amang si Rolando Dumantay, 62 anyos, residente sa Brgy. Graceville, San Jose del Monte, ang biktimang si Princess Marie Dumantay, 15 anyos, estudyante, iniulat na nawawala noon pang 9 Agosto 2022.

Natagpuan si Princess Marie, wala nang buhay at nakadapa sa lugar, may palatandaan ng mga paso ng sigarilyo sa katawan, nakasuot ng puting kamisetang may Chinese characters, itim na shorts, puting medyas, at pares ng itim na rubber shoes.

Ayon sa mga awtoridad, ang ama ng biktima ay pumirma ng pahintulot upang magsagawa ng awtopsiya sa bangkay ng kanyang anak kasunod ang desisyon ng pamilya na iuwi ang labi ni Princess sa kanilang tahanan sa Navotas.

Kasalukyang nagasasagawa ng follow-up operation ang mga awtoridad upang matukoy ang pagkakakilanlan ng salarin. (MICKA BAUTISTA)