Instant milyonaryo
BULAKENYO TUMAMA SA LOTTO

NAGING instant milyonaryo ang isang mananaya mula sa Balagtas, Bulacan matapos mapanalunan ang jackpot sa 6/49 Super Lotto na binola nitong Martes ng gabi, 2 Agosto.

Ayon kay Melquiades Robles, general manager at Vice Chairman of the Board ng Philippine Charity Sweepstakes Office (PCSO), tinamaan ng ‘anonymous winner’ sa Balagtas, Bulacan ang winning numbers na 28-45-09-12-21-19, may kabuuang premyo na P15,840,000.

Binobola ang 6/49 Super Lotto tuwing gabi ng Martes, Huwebes, at Linggo.

Gayondin, nakakuha ang 29 mananaya ng lima sa mga winning numbers na nanalo ng P50,000 bawat isa.

Samantala, may paalala ang PCSO na ang premyo na sobra sa P10,000 ay papatawan ng 20 porsiyentong buwis sa ilalim ng Tax Reform Acceleration and Inclusion Law.

Ang hindi makukuhang premyo sa loob ng isang taon matapos ang draw ay ikokonsiderang forfeited batay sa Republic Act 1169, ayon sa PCSO.

Para makuha ang premyo, ang mga lehitimong nagwagi ay siguraduhing isulat ang pangalan at lagda sa likod ng nanalong ticket.

Ang napanalunang lotto jackpot prizes ay makukuha sa PCSO main office sa Conservatory Bldg., Shaw Blvd., Priceton St., sa lungsod ng Mandaluyong. (MICKA BAUTISTA)