Gideon Buthelezi tulog sa 1^st round kay Pinoy prospect Dave Apolinario

IMPRESIBO ang ipinakita ni Filipino prospect Dave Apolinario nang patulugin niya sa 1^st round ang dating title challenger Gideon Buthelezi nung Biyernes sa International Convention Centre sa East London, South Africa.

Ipinakita ni Apolinario (17-0, 12 KOs) sa nasabing laban na handa na siya para sa mas mataas na kompetisyon nang pabagsakin niya ang pareho niyang kaliwete ng isang ‘left cross.’      Si Buthelezi (23-6, 5 KOs) ay nanatiling nakaluhod hanggang sa mabilangan siya ng sampu.

Umakyat si Apolinario, tubong Saranggani, sa ring na may iniindang lungkot sa pagkamatay ng kanyang ina tatlong buwan na ang nakararaan.

Sa kanyang panalo ay nasungkit niya ang minor IBO flyweight title.   Si Apolinario na may bansag na ‘Doberman’ ay promoted ng Sanman Promotions,  sa pangangalaga ni Jim Claude Manangguil at iniensayo ni Ronerex Dalut.

“We knew he would KO him. It was just a matter of time,” sabi ni  Manangquil.

“We’re gonna celebrate and work on bigger things next.”

Sa panalo ni Apolinario ay tinitiyak na tataas ang kanyang rankings sa mga sanctioning bodies.  Umakyat siya sa  ring kontra Buthelezi na rated  ng WBA bilang No. 6, No. 10 sa IBF at No. 15 ng WBO sa 112 pounds. 

Ang pinakamalaking panalo ni Buthelezi ay nang magrehistro siya ng split decition laban kay Hekkie Budler noong 2011, lumaban siya sa world title sa parehong taon kay Adrian Hernandez na natalo siya via 2^nd round knockout para sa WBC junior flyweight title. 

SA pagkatalo ni Buthelezi ay nasira ang  inirehistro niyang siyam na sunud-sunod na panalo simula pa noong 2015.