Sa Cagayan <br> HEALTHCARE WORKER GINAHASA, PINASLANG

NATAGPUANG wala nang buhay ang isang 27-anyos respiratory therapist sa ilalim ng kama sa kanyang silid sa Brgy. Carig Sur, sa lungsod ng Tuguegarao, lalawigan ng Cagayan, nitong Lunes, 25 Abril.

Kinilala ng mga imbestigador ang biktimang si Ma. Jennifer Suzette Oñate, 27 anyos, tubong Gattaran, Cagayan, at nagtatrabaho sa Cagayan Valley Medical Center.

Ayon sa pulisya, nakabalot ng kumot ang katawan ni Oñate at inilagay sa karton nang makita ito sa kaniyang inuupahang silid sa Tumanguil St., sa nabanggit na barangay, dakong 5:00 pm kamakalawa.

Narekober din sa silid ang isang bag na naglalaman ng duguang mga damit ng biktima.

Nadakip sa bayan ng Gonzaga ang suspek na kinilalang si Vilfred Carodan, 31 anyos, kasera ng biktima, na umaming siya ang gumahasa at pumatay kay Oñate.

Ayon sa salaysay ng asawa ni Oñate na si Renz, hindi sumasagot ang biktima sa kanyang mga tawag sa telepono simula noong Sabado ng gabi, 23 Abril. (KARLA OROZCO)