13 indibidwal timbog sa sunod-sunod na operasyon ng pulisya

NASAKOTE ang 13 indibiduwal sa magkakasunod na operasyong isinagawa ng Bulacan PPO hanggang Linggo ng madaling araw, 24 Abril.

Batay sa ulat ni Bulacan PPO Acting Provincial Director P/Col. Rommel Ochave, nadakip ang pitong drug suspects sa magkakahiwalay na buy bust operation ng Station Drug Enforcement Units (SDEU) ng mga police stations ng Baliwag, Guiguinto, Bulakan, Calumpit, at Pandi.

Kinilala ang mga suspek na sina Mark Tandog, Robert Francisco, Normando Oabina, Manuel Regalado, Juanita Nolasco, at Revinzor Cabacan.

Samantala, dinampot din ang tatlo pang pinaghahanap ng batas sa serye ng manhunt operations na kinilalang sina Antonio Murphy, Noli Dignos, at Jose Rico Roxas ng Bulakan, Bulacan; habang apat ang naaktohan sa ilegal na pagsusugal ng cara y cruz.

Kasalukuyang nasa kustodiya ng kani-kanilang mga arresting units/stations ang mga akusado para sa tamang disposisyon. (MICKA BAUTISTA)