HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
INAMIN ni Sunshine Guimary na balang araw makakawala rin siya sa paggawa ng sexy movies.
Hindi naman nagrereklamo si Sunshine sa pagpapakita ng kanyang kaseksihan dahil doon talaga siya nagsimula at nakilala. Ipinagpapasalamat nga niya na sunod-sunod ang mga pelikulang ginagawa sa Viva.
Aniya, ”Mahirap ‘yung feeling na alam mo ng naka-signature na sa ‘yo ‘yung sexy, siyempre ‘yon ang hahanapin sa ‘yo ‘di ba? So the challenge for me, parang walang pelikula na hindi ako puwedeng hindi maghubad.
“Parang naging requirements na siya ‘pag mayroon kang tatak na sexy profile, parang hindi na ikaw ‘yon ‘pag hindi mo kayang maghubad, ganyan. And ako naman, siyempre, pinaninindigan ko ‘yon at ibinibigay ko pa rin lahat kung ano ang kailangan sa akin,” sambit ni Sunshine na pagkatapos ng Kaka at Shot! Shoot Di Ko Siya Titigilan sa House Tour naman siya mapapanood simula October 22, 2021 sa Vivamax na idinirehe ni Roman Perez.
Pangarap ni Sunshine na makagawa rin siya ng serious movies. ”Siyempre pangarap ko na magkaroon ng super serious na movie, ‘yung may awayan, selosan, mistresses. ‘Yung totoong banatan at ‘yon ang isa sa pangarap kong gawin.
“Yon ang palagi kong pinagpe-pray, pero siyempre kung anong gusto ng mga big boss natin sa Viva susunod pa rin naman ako. Pero ‘yung pangarap ko sana mangyari rin yon,” wish ng tinaguriang braless vlogger.
Inilunsad si Sunshine ng Viva Films via Kaka noong February 2021. Sa Housetour na isang sexy heist thriller movie ay makakasama niya sina Cindy Miranda, Mark Anthony Fernandez, Marco Gomez, at Diego Loyzaga.
Ginagampanan ni Sunshine ang isang award winning actress na si Gabby na asawa ni Franco (Rafa Siguion-Reyna) na dating manlalaro sa Olympics at naninirahan sa isang mala-resort na tahanan. Sikat silang vloggers na nang mahilingan ng viewers ay nagpa-housetour. Sa kasamaang palad, isang akyat-bahay gang ang nakapanood niyon at pinag-aralang mabuti ang pasikot-sikot ng kanilang bonggang bahay. Doon magaganap ang hindi inaasahan ng mag-asawang Gabby at Franco. Kung ano iyon, ‘yan ang dapat alamin sa pagtutok sa Vivamax.
