Sunshine tanggap na ‘di makakawala sa pagpapa-sexy

SHOWBIZ KONEK
ni Maricris Valdez Nicasio

AMINADO si Direk Roman Perez na hindi mawawala ang pa-sexy sa kanyang mga pelikula. Tulad ng mga naidirehe niyang pelikula sa Viva Films, ang Adan (2018), The Housemaid (2021), at Taya (2021), may sexy scenes din ang House Tour kahit sabihin pang ito ay isang heist thriller movie na pinagbibidahan nina Cindy Miranda, Diego Loyzaga, Sunshine Guimary, Mark Anthony Fernandez, at Marco Gomez.

‘Ika nga ni Direk Roman sa virtual media conference ng House Tour, matindi ang sexual tension sa mga role na ginagampana n nina Cindy at Sunshine kaya importanteng mga sexy scene. ”Napaka-importante siyempre, it’s a romantic serious film, importanteng may sexy, hindi joke lang, joke lang po,” panimula ni Direk Roman.

Ang pelikula ay tila all about money heist na may patayan at matitindi  ang eksena. Kaya natanong ang director kung bakit kailangan pang lagyan ng pa-sexy ang pelikula.

“Napaka-importante po lalo na sa character nina Sunshine at Cindy. Ang character ni Cindy ay isang jologs na magnanakaw na wannabe na gagawin talaga ang lahat para matupad lang ang mga pangarap na tulungan ang pamilya. Kaya rin siya na-involve sa gang ni Mark Anthony. May sexual tension between sa loob ng gang na napaka-importante na hindi ko ikukuwento kung bakit.

“And doon sa character ni Gabby ang turning point ng pelikula, kasi napakalaki ng sexual conflict kaya humantong ang housetour sa isang heist movie,” paglalahad ni Direk.

Inamin din ng director na mahirap i-ignore ang kaseksihan nina Sunshine at Cindy. ”Silang dalawa mahirap gumawa ng romcom para sa kanila, sayang ang pelikula. Meaning ang ganda pong vehicle nito para gumawa ng ganitong experimental heist film na medyo sexy-thriller.”

Sinabi naman ni Sunshine na hindi na talaga siya makakawala sa paggawa ng sexy movies.

“Hindi na talaga mawawala sa akin ang sexy, kaya ang challenge sa akin, walang pelikula na hindi ako puwedeng hindi maghubad. Parang requirements na `yon, na ‘pag may movie ko, dapat maghubad ako,” sabi ni Sunshine.

“Basta ako, ibinibigay ko lang kung ano ang kailangan!!” dagdag pa tinaguriang braless vlogger.

Sinabi naman ni Cindy na basta movie ni Direk Roman automatic na  may sexy scene talaga.

“Pero sana ang mga tao, kahit nakilala kaming mga sexy actress, sana makita rin nila ang kakayahan namin sa pag-arte,”sambit pa ni Cindy.

Kasama rin sa pelikula sina Rafa Siguion-Reyna, Chad Kinis, Abby Bautista, Juliana Parizcova Segovia, Jeffrey Hidaldgo, Jobelyn Manuel, Liz Alindogan, Raquel Monteza, Angie Castrence, at Jim Pebanco. Mapapanood na ito sa October 22 sa Vivamax.