GMA at Regal sanib-puwersa sa biggest telemovie collab

Rated R
ni Rommel Gonzales

DALAWA sa mga tinitingalang institusyon sa TV at pelikula ang magsasama para sa isang malaki at espesyal na anthology series na aabangan ngayong taon.

Nagsanib ang GMA Network at Regal Entertainment, Inc. para ihandog ang Regal Studio Presents na maghahatid ng mga bago at napapanahong TV specials kada linggo.

Tampok sa unang pasabog ang That Thin Line Between na ang bida ay sina Ken Chan at Sanya Lopez. Ito rin ang magsisilbing unang on-screen tambalan ng dalawa. Gagampanan nila ang magkapitbahay na accountant at online seller na mahilig magbangayan dahil magkaiba ang  mga paniniwala at ugali.

Bukod dito, marami pang offerings ang Regal Studio Presents na pagbibidahan ng mga sikat na Kapuso love teams tulad nina Gabbi Garcia at Khalil Ramos or GabLil at sina Sofia Pablo at Allen Ansay ng Team Jolly.

Kaya huwag palalampasin ang mga nakaaantig na istorya na handog ng Regal Studio Presents sa two-part primetime premiere nito sa September 11 at 18, 8:30 p.m., bago lumipat sa regular timeslot nito, 4:35 p.m. kada Linggo simula September 26 sa GMA.