HATAW! D'yaryo ng Bayan hatawtabloid.com
KALABOSO ang isang empleyado ng Taguig City Hall at ang kanyang kalaguyo nang mahuli sa akto sa loob ng isang motel sa lungsod ng Pasig, nitong Sabado ng hapon, 28 Agosto.
Kinilala ni P/Col. Roman Arugay, hepe ng Pasig City Police, ang mga nasakote sa motel na sina Von Agsaulio, 45 anyos, may asawa, at empleyado ng Taguig City Hall; at alyas Cristina, 43 anyos, may asawa, kapwa mga residente sa lungsod ng Taguig.
Nabatid na dakong 2:00 pm kamakalawa, naaresto ang dalawa sa loob ng motel sa Mabini St., Brgy. Kapasigan, sa reklamo sa Pasig PNP ng mister ni alyas Cristina.
Agad nagsagawa ng follow-up operation sina P/Cpl. Mark Butay at Pat. Renz Adrian Gillego ng Pasig PNP Sub-Station 2 kasama ang nagrereklamong mister.
Huli sa akto ang dalawa sa loob ng Room 304 habang papalabas ng pinto si Agsaulio at nakahiga sa kama ang ginang nang walang saplot.
Base sa kuha ng CCTV, limang oras nang naka-check-in sa silid ang dalawa na pinatotohanan ng roomboy ng motel.
Nakapiit ang magkalaguyo sa detention cell ng pulisya at nahaharap sa kasong Adultery.
(EDWIN MORENO)
