Magkalabang gang naglaban, estudyante kritikal sa tama ng bala

KRITIKAL sa pagamutan ang isang 17-anyos estudyante matapos barilin ng tatlong teenager nang magsagupa ang dalawang magkalabang gang sa Malabon City, kahapon ng madaling araw.

Isinugod ng kanyang ina sa Tondo Medical Center (TMC) ngunit kalaunan ay inilipat sa Philippine Orthopedic Center (POC) ang biktimang itinago sa pangalang  Dave ng Navotas City dahil sa tama ng hindi nabatid na kalibre ng baril sa katawan.

Kaugnay nito, ipinag-utos  ni Malabon City Police Chief P/Col. Albert Barot kay Sub-Station 5 commander P/Lt. Zoilo Arquillo ang manhunt operation laban sa mga suspek na kinilalang sina Albert Lozano, Ayan Calidro, kapwa residente sa Block 13 Hiwas St., Dagat-dagatan, Brgy. Longos, at Deniel Soria ng Sawata St., Caloocan City.

Batay sa ulat ni Malabon police homicide investigator P/SSgt. Diego Ngippol, dakong 4:00 am kahapon sa Hiwas St., Brgy. Longos, nang magsagupa ang magkalabang gangs na Original Batang Tondo (OBT) at Stoke Fam (SF).

Sa pahayag sa pulisya ng mga nakasaksi, magkakasunod na nagpaputok ng kanilang pen gun ang tatlong suspek na miyembro ng SF gang patungo sa biktima na isang miyembro ng OTB.

Nang mapansin ng dalawang grupo ang mga nagrerespondeng pulis at barangay officials, mabilis nagpulasan sa magkakahiwalay na direksiyon habang naiwan ang duguang biktima. (ROMMEL SALES)