20 pasaway sa Bulacan arestado

SUNOD-SUNOD na pinagdadakip ng mga awtoridad ang 20 tigasin at pasaway sa lalawigan ng Bulacan sa serye ng mga operasyon laban sa krimen mula Sabado, 10 Hulyo hanggang Linggo ng umaga, 11 Hulyo.

Sa ulat mula kay P/Col. Lawrence Cajipe, provincial director ng Bulacan PNP, nasakote ang mga suspek na sina Ernesto Magsino, Jr., ng Abangan Norte, Marilao; Edson Manozca ng Tabing-Ilog, Marilao; Ronaldo Alaoria, alyas Ronnie ng Paliwas, Obando; at Raymond Cortez, alyas Emon ng Banga 2nd, Plaridel, sa mga ikinasang anti-illegal drug sting sa mga bayan ng Marilao, Obando, at Plaridel.

Nakompiska mula sa mga suspek ang 26 pakete ng hinihinalang shabu at buy bust money na dinala sa Bulacan Crime Laboratory Office kasama ng mga suspek para sa naaangkop na pagsusuri.

Kasunod nito, nadakip ang pitong suspek sa iba’t ibang insidente ng krimen na naganap sa mga bayan ng Baliwag, Norzagaray, at San Rafael.

Arestado ang limang suspek sa magkasanib na joint entrapment operation na ikinasa ng Bulacan Provincial Intelligence Unit (PIU) at San Rafael MPS sa pagbebenta ng smuggled o untaxed na mga sigarilyo, samantala ang dalawa ay inaresto sa mga kasong Qualified Theft at paglabag sa Article III Sec 43 Par. B ng RA 4136 (Land Transportation and Traffic Code), Unjust Vexation at Oral Defamation.

Natimbog din ang siyam na suspek sa inilatag na anti-illegal gambling operations ng mga operatiba ng Marilao MPS at Pandi MPS, anim sa kanila ang huli sa aktong nagsusugal ng poker at  tong-its, habang nadakip ang tatlong suspek sa tupada, nasamsam mula sa kanila ang mga barahang pangsugal, mga manok na panabong, mga tari ng manok, at bet money.

(MICKA BAUTISTA)