No. 2 most wanted sa Malabon, naaresto ng NPD sa Rizal

NAGWAKAS ang pagtatago ng tinaguriang no. 2 most wanted person sa Malabon nang masakote ng mga tauhan ng Northern Police District (NPD) sa kanyang pinagtataguan sa Baras, Rizal.

Kinilala ni NPD District Special Operation Unit (DSOU) head P/Lt. Col. Jay Dimaandal ang naarestong suspek na si Gian Carlo Padua, 31 anyos, residente sa Pineapple Road, Brgy. Potrero, Malabon City.

Sa report ni P/Lt. Col. Dimaandal kay NPD Director P/BGen. Jose Hildalgo, Jr., nakatanggap sila ng impormasyon na nagtatago ang suspek sa isang lugar sa Baras, Rizal, dahilan upang bumuo ng team ang DSOU sa pangunguna ni P/Lt. Melito Pabon.

Dakong 10:30 pm, kasama ang NDIT-RIU NCR, RID-NCR, DID-NPD, HPG-NPD at mga tauhan ng Baras Police Station, agad nilang tinungo ang pinagtataguan ng akusado sa Southville 9, Pinugay, Baras Rizal na nagresulta sa pagkakaaresto sa suspek.

Ayon kay P/Lt. Col. Dimaandal, si Padua, DILG MWP with reward at miyembro ng notoryus na Limos Carnapping Crime Group, ay inaresto sa bisa ng warrants of arrest na inisyu ni Hon. Josien N. Rodel, Presiding Judge ng RTC Branch 293 ng Malabon City para sa kasong paglabag sa RA 10833 (The New Anti- Carnapping Law of 2018), walang inirekomendang piyansa; at paglabag sa Article 308 RPC para sa kasong Theft na inisyu ni Hon. Ma. Ofelia Salgado Contreras-Soriano ng MTC Branch 55. (ROMMEL SALES)