Babaeng guro sa Quezon itinumba

BINAWIAN ng buhay ang isang babaeng public school teacher nang pagbabarilin ng hindi kilalang suspek nitong Lunes ng hapon, 28 Hunyo, sa bayan ng Sariaya, lalawigan ng Quezon.

Sa ulat ng Sariaya police, nakaangkas ang biktimang kinilalang si Marilou Lagaya, 48 anyos, sa motorsiklong minamaneho ng kanyang pinsang si Maricel Surquia, nang pagbabarilin ng suspek na armado ng kalibre .45 baril, dakong 3:40 pm kamakalawa, sa Sitio Berhinan, Brgy. Manggalang.

Agad namatay si Lagaya, habang nakatakas ang armadong suspek.

Nabatid na pauwi sa kanilang bahay si Lagaya sa Brgy. Montecillo, mula sa Manggalang 1 Elementary School na kanyang pinagtuturuan nang pagbabarilin ng gunman.

Agad tumakas ang gunman kasama ang iba pang suspek sa direksiyon ng Brgy. Manggalang Tulo-Tulo, ayon sa pulisya.

Natagpuan ng mga nagrespondeng pulis ang slug ng tingga at pitong basyo ng bala ng kalibre .45 sa pinangyarihan.

Patuloy ang imbestigasyon ng mga awtoridad upang matukoy ang motibo sa likod ng pamamaslang. Nagkasa ang pulisya ng hot pursuit operations upang matunton at madakip ang suspek.