18-anyos dalagang nalasing, niluray ng kaibigan

LABIS na tiwala sa naturingang kaibigan, isang dalaga ang pinagsamantalahan habang lasing sa isang bahay sa bayan ng San Ildefonso, lalawigan ng Bulacan.

Kinilala ang suspek ng mga tauhan ng San Ildefonso Municipal Police Station (MPS), na si Jerick Cunanan,  agad natutop sa isang lugar sa Brgy. Mataas na Parang, sa nabanggit na bayan.

Lumilitaw sa ulat ng pulisya, una munang nagkayayaang mag-inuman ng alak ang grupo ng suspek at biktima na isang 18-anyos dalaga.

Dahil tiwala sa mga kaibigan, nakipagtagayan ang biktima hanggang maitumba nila ang maraming bote ng alak na ikinalasing ng biktima.

Nagpasya ang biktima na habang lasing na lasing ay mamahinga muna sa isang lugar kung saan palihim siyang sinundan ng suspek.

Saglit pa, naramdaman ng biktima na may naghuhubad kanyang mga suot na damit hanggang kubabawan siya ng suspek na kahit lasing ay nagawa niyang kilalanin.

Dahil hinang-hina dulot ng kalasingan, hindi nagawang makapanlaban ng biktima hanggang tuluyang mailugso ng suspek ang kanyang pagkababae.

Nang mahimasmasan, agad nagsumbong ang biktima kasama ang mga kaanak sa himpilan ng San Ildefonso MPS na nagresulta sa pagkakadakip ng suspek bago tuluyang makalayo.

(MICKA BAUTISTA)