HATAW! D'yaryo ng Bayan hatawtabloid.com
MATAPOS ang matagal na panahong pagtatago sa batas, nadakip ng mga awtoridad ang isang lalaking gumahasa sa isang menor de edad sa lungsod ng San Jose del Monte, lalawigan ng Bulacan, nitong Martes ng gabi, 16 Pebrero.
Kinilala ang naarestong suspek na si John Alma, Jr., 42 anyos, kasalukuyang naninirahan sa Brgy. Minuyan II, sa naturang lungsod.
Nadakip ang suspek sa bisa ng arrest warrant sa kasong rape dakong 9:15 pm kamakalawa.
Isinilbi ng mga tauhan ng San Jose Del Monte CPS kasama ang mga elemento ng 1st MP, 2nd PMFC-Bulacan PPO, 301st RMFB-3 at 24th Special Action Company (SAF) ang warrant of arrests laban sa akusado para sa paglabag sa RA 7610 o Special Protection of Children Against Child Abuse, Exploitation and Discrimination Act, at Qualified Rape (12 counts), na parehong walang piyansa, nilagdaan ni Honorable Judge Ma. Cristina Geronimo Juanson ng Branch 5-FC Regional Trial Court SJDM.
Kaugnay nito, pinuri ni Bulacan Police Director P/Col. Lawrence Cajipe ang mga operatiba na humuli kay Alma sa maayos na trabaho at resulta ng suporta mula sa komunidad na nagturo sa kinaroroonan ng akusado.
(MICKA BAUTISTA)
