HATAW! D'yaryo ng Bayan hatawtabloid.com
ARESTADO ang 21 mangingisda sa pinatinding pagpapatupad ng anti-illegal fishing operation ng pulisya sa mga bayan ng Bulakan, Paombong at Obando, sa lalawigan ng Bulacan hanggang kahapon, 17 Pebrero.
Sa ulat na ipinadala kay P/Col. Lawrence Cajipe, provincial director ng Bulacan Police Provincial Office, unang naglatag ng operasyon ang Paombong MPS katuwang ang Bulacan Fisheries and Aquatic Resources (BFAR) na nagresulta sa pagkasa anim na mangingisdang sakay ng magkahiwalay na bangkang de motor habang nangingisda gamit ang motorized net (trawl) sa coastal areas ng Brgy. Sta. Cruz, sa bayan ng Paombong dakong 10:00 am, nitong Martes, 16 Pebrero.
Kinilala ang mga naarestong suspek na sina Ryan Papa, FJL1 Fishing Boat Captain; Jhon Aries Burgos, FJLJ NICO Fishing Boat Captain; Whelinder Salamat, Let-Let Fishing Boat Captain; Wilson San Diego, Mario Polita, at Tomas Galicia, Jr., pawang mga residente sa Brgy. Binuangan, bayan ng Obando.
Nakompiska sa mga mangingisda ang pitong banyerang naglalaman ng halos 18 kilo ng isdang dulong na tinatayang nagkakahalaga ng P14,000.
Dinala ang mga nasamsam na ebidensiya sa Bulacan Bureau of Fisheries and Aquatic Resource para sa kaukulang disposisyon.
Samantala, sa isa pang illegal fishing operations na ikinasa ng Obando MPS at Obando Municipal Fisheries and Aquatic Resources Management Council, naaktohan ang pitong mangingisda na gumagamit ng drag net/fine mesh net sa coastal area ng Brgy. Salambao, sa bayan ng Obando, dakong 10:45 pm kamakalawa.
Kinilala ang mga naarestong mangingisda na sina Crisostomo Tolentino, fishing Boat Captain (Mulawin boat); Rommel Cabral, fishing Boat Captain (Raymond boat); Christopher Lintag, Fishing Boat Captain (Princess Anika Boat); Armando Lintag, fisherman/helper; at Christian Santos, fisherman/helper, pawang mga residente sa Sta. Elena, sa bayan ng Hagonoy; at Raymond Regalado, fisherman/helper mula San Pablo, sa naturang bayan.
Kinompiska sa mga mangingisda ang tatlong bangkang de motor na may mga tatak na Mulawin, Raymond, at Princess Anika; tatlong set ng fine mesh; fish nets; at banyera na naglalaman ng halos 40 kilo ng isdang kabasi, na tinatayang nagkakahalaga ng P2,000.
Sa pinakahuling illegal fishing operation, nasukol ang siyam na mangingisda ng mga tauhan ng Bulakan MPS, nang maispatan sa bangkang de motor habang nangingisda sa marine protected area sa coastal area ng bayan ng Bulakan, dakong 3:30 am kahapon.
Nabigo ang mga mangingisda na magpakita ng fishing permit at mga kaukulang dokumento kaya inaresto sila ng mga tauhan ng Bulakan MPS.
Kinilala ang mga mangingisdang sina Aghamin Marquez, alyas Amen; Elias Guevarra; Aaron Marquez, alyas Gaga; Anghelo Pagtalunan, alyas Bunso; Mark Joseph Ocampo, alyas Puroy; Jonas Paul Guevarra; Michael Dalistan, alyas Potong; Angelito Escanilla, alyas Lito; at Francisco Guevarra, alyas Kokoy, pawang mga residente sa Tibig, sa naturang bayan.
Nakompiska sa mga mangingisda ang apat na bangkang de motor na gamit sa pangingisda sa laot.
(MICKA BAUTISTA)
