HATAW! D'yaryo ng Bayan hatawtabloid.com
NAGWAKAS ang maliligayang araw ng lider ng isang gun-for-hire group nang mapatay sa pakikipagbarilan sa pulisya sa lungsod ng San Jose del Monte, sa lalawigan ng Bulacan nitong hatinggabi ng Martes, 1 Disyembre.
Sa ulat ng CIDG Bulacan kay P/Col. Lawrence Cajipe, Bulacan police director, kinilala ang suspek na si Rizaldy Gutierrez, 45 anyos, residente sa Concordia Subdivision, Barangay Dulongbayan, sa nabanggit na lungsod.
Napaslang si Gutierrez nang makipag-enkuwentro sa inilatag na buy bust operation ng mga elemento ng CIDG Bulacan dahil sa mga ilegal na armas at paglabag sa RA 10591.
Nabatid, habang nagaganap ang buy bust transaction sa armas ay nakatunog si Gutierrez na operatiba ang kanyang kausap kaya agad na tumakbo sa loob ng kanyang bahay at kinuha ang baril saka pinaputukan ang mga awtoridad na napilitang gumanti na nagresulta sa kanyang kamatayan.
Napag-alamang si Gutierrez ay sinasabing lider ng gun-for-hire group at sangkot sa extortion activities sa lungsod at mga karatig lugar.
Nasamsam sa crime scene ang isang kalibre .45 at isang kalibre .38 baril na kargado ng bala, at P3,500 buy bust money. (MICKA BAUTISTA)
