HATAW! D'yaryo ng Bayan hatawtabloid.com
SUNOD-SUNOD na nadakip ng mga awtoridad ang 16 kataong lumabag sa batas sa pinaigting na kampanya ng Bulacan police laban sa kriminalidad sa lalawigan hanggang kamakalawa, 22 Nobyembre.
Sa ulat na ipinadala kay P/Col. Lawrence Cajipe, direktor ng Bulacan Police Provincial Office, naaresto ang pitong suspek na pinaghahanap ng batas sa bisa ng warrants ng tracker teams ng Norzagaray, Hagonoy, Plaridel, Baliwag, San Ildefonso, Sta Maria, at Bulacan Provincial Intelligence Unit (PIU) kasama ang Pulilan MPS.
Kasunod nito, natiklo din ang anim pang suspek sa iba’t ibang insidente ng krimen na tinugunan ng mga elemento ng Bocaue, Bustos, Pandi at San Jose del Monte City PNP.
Kabilang sa naaresto ang isang lalaki na nagsasanla ng pekeng gintong pulseras sa isang sanglaan sa Barangay Poblacion, sa bayan ng Bustos; tatlong lalaki dahil sa robbery hold-up sa harap ng McDonald sa Barangay Muzon, sa lungsod ng San Jose del Monte; isang magnanakaw ng bisikleta sa Barangay Turo, sa bayan ng Bocaue; at isang construction worker ang dinampot sa Barangay Bunsuran 1st, sa bayan ng Pandi dahil sa pagmumura at pagbalibag ng baso sa mukha ng kanyang stepdaughter.
Arestado rin ang tatlo katao na huli sa aktong nagsusugal ng tong-its sa Heritage Homes, Barangay Loma de Gato, sa bayan ng Marilao, sa anti-illegal gambling operation na ikinasa ng mga operatiba ng Marilao MPS.
Nakompiska mula sa kanila ang isang set ng baraha at na nagkakahalaga ng P1,015. (MICKA BAUTISTA)
