Pulis-Bulacan, todas sa ambus suspek tinutugis

PATAY ang isang pulis-Bulacan matapos tambangan ng mga hindi kilalang suspek habang lulan ng minamanehong sasakyan sa bayan ng Bustos, sa lalawigan ng Bulacan, nitong Sabado, 14 Nobyembre.

Kinilala ang biktimang si P/Cpl. Abdulsamat Saipuddin, 46 anyos, miyembro ng Philippine National Police (PNP) at kasalukuyang nakatalaga sa Angat Municipal Police Station (MPS).

Sa imbestigasyon, nabatid na sakay si Saipuddin ng minamaneho niyang pulang Toyota Innova nang tambangan at pagbabarilin ng mga suspek habang binabagtas ang lansangan sa Bonga Menor, sa bayan ng Bustos, sa naturang lalawigan.

Nabatid na nakasuot ang suspek ng mga bonnet at sakay ng kulay abong Honda Civic sedan na walang plaka, at armado ng M16 rifle, caliber 9mm, at may back-up na dalawang motor­siklong Yamaha NMAX.

Kaugnay nito, inatasan ni Region 3 Police Director P/Gen. Valeriano de Leon ang Bulacan PNP na magsa­gawa ng isang masu­sing imbestigasyon sa naganap na pananambang kay Saipuddin. (M. BAUTISTA)