HATAW! D'yaryo ng Bayan hatawtabloid.com
PARTY-PARTY na ulit ang mga tomador sa Valenzuela City dahil ipawawalang-bisa na bukas, 15 Oktubre ang Stay Sober Ordinance na nagbabawal sa pagbebenta, pagbili, at pag-inom ng alak sa lungsod.
Gayonman, tiyak na maninibago ang maraming manginginom dahil mahigpit nang ipinagbabawal ang pagtagay o paghihiraman ng baso sa kapalit na ipatutupad na Liquor Regulation During Pandemic Ordinance.
Batay sa nasabing ordinansa, kung iinom ng alak ay dapat na siguruhing nasusunod ang health and safety protocols na ipinatutupad sa lungsod.
Bawal rin ang pagbebenta ng alak tuwing curfew hours mula 10:00 pm hanggang 5:00 am. Hindi rin dapat bentahan ng alak ang mga menor-de-edad at buntis.
Bawal pa rin ang pagtoma sa mga pampublikong lugar at puwede lamang uminom ng alak sa mga tahanan o mga pribado/komersiyal na establisimiyento gaya ng restaurants.
Ang mga senglot o kahit nakainom lang ay hindi rin dapat na lumaboy pa sa kalye.
Nakasaad din sa ordinansa na hanggang apat na bote ng serbesa ang maaring ibenta sa isang indibiduwal sa mga restaurant at retail store kada araw, at hanggang isang bote ng hard drinks gaya ng brandy at whiskey ang puwedeng ibenta kada tao bawat araw, at ganoon din ang panuntunan sa wine.
Sampung case naman ng serbesa ang puwedeng ibenta ng mga wholesaler, grocery store at dealer, at dalawang kahon kapag hard drinks.
Hindi rin puwedeng paghalu-haluin ang inumin dahil isang klase lamang ng nakalalasing na inumin ang maaaring ibenta sa isang indibidwal kada araw.
Maging ang videoke at acoustic live bands sa restobars at katulad na establisimiyento ay ibinawal na rin.
Ang mga lalabag sa ordinansa ay papatawan ng karampatang parusa at maaaring matanggalan ng business permit. (ROMMEL SALES)
