Misis na sakay patay mister na driver sugatan (Tricycle sinoro ng SUV)

BINAWIAN ng buhay ang isang misis na sakay ng tricycle matapos silang banggain ng isang humaharurot na sport utility vehicle (SUV) sa Quirino Highway, lungsod ng San Jose del Monte, sa lalawigan ng Bulacan, nitong Lunes, 5 Oktubre.

 

Dead-on-the-spot ang biktima na kinilalang si Sharon Ancheta, habang sugatan ang kaniyang mister na driver ng tricycle na si Genesis Ancheta.

 

Samantala, nadakip ng mga tauhan ng San Jose del Monte City Police Station (CPS) ang driver ng SUV na kinilalang si Doren Sapil, 42 anyos, residente sa bayan ng Rodriguez (Montalban), lalawigan ng Rizal.

 

Nabatid sa ulat, unang nasagi ni Sapil ang isang nagbibisikleta na kaniyang tinakasan kaya humarurot sa pagmamaneho ng SUV.

 

Sa pagmamadaling makatakas, nabangga ng SUV ang tricycle ng mag-asawa na sa lakas ng pagkabangga ay humiwalay ang motorsiklo sa sidecar kaya tumilapon ang mga biktima.

 

Bumaligtad ang SUV sa bahagi ng Quirino Highway na tiyempong nakasagi pa ng isang dumaraang kotse sa lugar.

 

Nang arestohin, napag-alamang lasing si Sapil na ngayon ay nakadetine sa SJDM CPS custodial facility at nahaharap sa mga kasong reckless imprudence resulting in homicide at multiple physical injuries. (MICKA BAUTISTA)